![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBK3N3QXc9PSIsImV4cCI6bnVsbCwicHVyIjoiYmxvYl9pZCJ9fQ==--6fcf209171fcfab82e9af0ea0e02dee7b7a11b4a/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/9A85F6E0-5EAE-4FCA-BB74-2746CB4.jpeg)
លោកជំទាវបានបន្ថែមថា ពិតមែនតែអូមីក្រុង មានកម្រិតវាយប្រហារលើសុខភាពស្រាលជាង ប៉ុន្តែយើងមិនត្រូវមើលស្រាលលើលទ្ធភាពវ៉ៃលុករបស់អូមីក្រុងលើសុខភាពរបស់យើងនោះឡើយ។ ជាក់ស្តែងនៅតាមបណ្តាប្រទេសមួយចំនួននៅលើពិភពលោកបាននិងកំពុងមានករណីស្លាប់ដោយការវ៉ៃលុកពីវីរុសអូមីក្រុងនេះ បន្តកើនឡើងជាលំដាប់ ហើយនៅថ្ងៃទី១៤ ខែកុម្ភៈស្អែកនេះ គឺជាទិវានៃក្តីស្រលាញ់ ដូច្នេះសូមផ្តល់ក្តីស្រលាញ់ ទៅមនុស្សជាទីស្រលាញ់ ដោយអនុវត្ត ០៣ការពារ និង០៣កុំ និងនាំមនុស្សជាទីស្រលាញ់ទៅចាក់វ៉ាក់សាំង ដើម្បីសុវត្ថិភាពទាំងអស់គ្នា។
លោកជំទាវវេជ្ជបណ្ឌិត បានសង្កត់ធ្ងន់ថា ៖ “ខ្ញុំសូមអំពាវនាវដ៏ទទូចដល់បងប្អូនប្រជាពលរដ្ឋទាំងអស់ រួមជាមួយនឹងយុវវ័យ ដែលចង់បង្ហាញពីក្តីស្រលាញ់របស់ខ្លួន ខណៈពេលដែលនៅថ្ងៃស្អែកនេះ គឺជាទិវានៃក្តីស្រលាញ់ សូមចូលរួមទប់ស្កាត់ការចម្លងវីរុសកូវីដ-១៩ អូមីក្រុង ចាប់ពីពេលនេះតទៅ ការទប់ស្កាត់នេះគឺដើម្បីបង្ហាញពីក្តីស្រឡាញ់របស់យើង ទៅកាន់មនុស្សជាទីស្រលាញ់ រួមមានក្រុមគ្រួសារ សាច់ញាតិ និងមិត្តិភក្តិ ជាដើម។ ដូច្នេះដើម្បីបង្ហាញនូវក្តីស្រលាញ់ សូមកុំទុកឱ្យហួសពេលរហូតដល់មានវិប្បដិសារី”។
លោកជំទាវបានបន្ថែមថា ថ្ងៃនៃក្តីស្រលាញ់ (១៤កុម្ភៈ) មិនមែនជាទំនៀមទម្លាប់ ឬប្រពៃណីជាតិខ្មែរនោះទេ តែក៏មានបងប្អូនប្រជាពលរដ្ឋយើងចូលរួមប្រារព្ធថ្ងៃនៃក្តីស្រលាញ់នេះ ដើម្បីបង្ហាញនូវក្តីស្រលាញ់ដល់មនុស្សជាទីស្រលាញ់ ជាពិសេសគឺយុវជនមួយចំនួន បានយកថ្ងៃនេះជាថ្ងៃជួបជុំ ពិសាអាហារ និងដើរលេងកម្សាន្ត ជាដើម ប៉ុន្តែនៅក្នុងបរិបទនៃការឆ្លងរាលដាលនៃវីរុសកូវីដ-១៩ ប្រភេទអូមីក្រុង បងប្អូនសូមកុំភ្លេចខ្លួនឱ្យសោះថា អូមីក្រុងកំពុងចរាចរយ៉ាងសកម្មនៅក្នុងសហគមន៍ ដូច្នេះសូមបងប្អូនជនរួមជាតិ សូមផ្តល់ក្តីស្រលាញ់តាមរយៈការអនុវត្ត០៣ការពារ និង០៣កុំ និងជូនមនុស្សជាទីស្រលាញ់ទៅចាក់វ៉ាក់សាំងដូសជំរុញវិញទើបជាការប្រសើរ ព្រោះថាវ៉ាក់សាំងនៅតែជាឧបករណ៍ដ៏មានប្រសិទ្ធភាព ហើយការអនុវត្តវិធានការ០៣ការពារ និង០៣កុំបន្ថែមទៀត នឹងផ្តល់ឱ្យមនុស្សជាទីស្រលាញ់របស់យើង ចៀសផុតពីការឆ្លងជំងឺកូវីដ-១៩៕
ដោយ ផែន រតនៈ
0 comments:
Post a Comment