ស្ថានទូតជប៉ុនបើកមហោស្រពគីហ្សូណាជប៉ុន-កម្ពុជា២០២២ ក្រោមប្រធានបទ «គីហ្សូណានៅក្បែរអ្នកជានិច្ច» រយៈពេល៤ថ្ងៃ

(ភ្នំពេញ)៖ ស្ថានទូតជប៉ុនប្រចាំនៅកម្ពុជា រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) មជ្ឈមណ្ឌលអាស៊ីនៃមូលនិធិជប៉ុន បានរៀបចំបើកនូវមហោស្រពគីហ្សូណាជប៉ុន-កម្ពុជា ក្រោមប្រធានបទ «គីហ្សូណានៅក្បែរអ្នកជានិច្ច» បន្ទាប់ពីខកខានរយៈពេល២ឆ្នាំដោយតែការរាតត្បាតនៃជំងឺកូវីដ១៩។ កម្មវិធីនេះប្រព្រឹត្តិទៅពីថ្ងៃទី១៧ ដល់ថ្ងៃទី២០ ខែកុម្ភៈ ឆ្នាំ២០២២ នៅ CJCC។

ព្រឹត្តិការណ៍មហោស្រពគីហ្សូណា ត្រូវបានចាប់ផ្តើមនៅឆ្នាំ២០១២ ដើម្បីជំរុញការផ្លាស់ប្តូររវាងជប៉ុន និងកម្ពុជា លើវិស័យវប្បធម៌ និងអប់រំ។ តាំងពីពេលនោះមកមហោស្រពនេះត្រូវបានរៀបចំឡើងជារៀងរាល់ឆ្នាំដោយមានចំនួនអ្នកចូលរួមច្រើនកុះករ ជាពិសេសគឺយុវជនវ័យក្មេងដែលជាសសរទ្រូងនៃមិត្តភាពរបស់យើងនាពេលអនាគត។

ពិធីបើកធ្វើឡើងក្រោមអធិបតីភាពលោក មិកាមិ ម៉ាសាហីរ៉ូ ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា, លោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា, លោក ឡុង ប៉ុណ្ណាស៊ីរីវត្ថ រដ្ឋលេខាធិការក្រសួងវប្បធម៌ និងវិចិត្រសិល្បៈ ព្រមទាំងមានការចូលរួមពីឥស្សរជនមួយចំនួនទៀតផងដែរ។

ថ្លែងក្នុងកម្មវិធីនេះ ឯកអគ្គរាជទូតជប៉ុន បានលើកឡើងថា ប្រធានបទនៃមហោស្រពឆ្នាំនេះ គឺ «គីហ្សូណានៅក្បែរអ្នកជានិច្ច»។ «គីហ្សូណា» មានន័យថា «ចំណងមិត្តភាពដ៏ស្អិតរមួត» ដូច្នេះទោះបីជា យើងមិនអាចចូលរួមជាមួយគ្នាក្នុងរូបភាពច្រើនគ្នាក្នុង ពេលតែមួយក៏ដោយ យើងជឿជាក់ថាស្ថានភាពកូវីដ១៩ បានបង្ហាញឱ្យយើងឃើញថា ចំណងមិត្តភាពដ៏ស្អិតរមួតរវាងប្រជាជន និងប្រជាជនយើង នឹងមិនងាយកាត់ផ្តាច់ងាយៗឡើយ។

លោក មិកាមិ ម៉ាសាហីរ៉ូ បានបន្តថា ស្ថិតក្រោមប្រធានបទនេះ លោកស្រី MINAMINO Yoko អ្នកចម្រៀង និងតារាសម្តែងជប៉ុនដ៏ល្បីមួយរូប ដែលធ្លាប់បានមកទស្សនកិច្ចនៅកម្ពុជា ជាលើកដំបូងក្នុងឆ្នាំ១៩៨៩ បានផ្ញើរជាសារ និងវីដេអូ សម្រាប់កម្ពុជា និងមហោស្រពគីហ្សូណាផងដែរ។

ឯកអគ្គរាជទូតជប៉ុនប្រចាំកម្ពុជាសង្ឃឹមថា សាធារណជននឹងរីករាយទស្សនាវីដេអូ ព្រមទាំងការសម្តែងរបស់សិល្បករកម្ពុជាដ៏ល្បីបែបហ៉ិបហប គឺលោក វុទ្ធា មកពីក្រុមក្លាបយ៉ាហែន (Klap Ya Hands) ការសម្តែងរបស់ក្រុមស្គរមេគង្គដៃកុ និងការសម្តែងរបាំផ្សេងៗទៀត។ ទាំងនេះហើយ ដែលនឹងធ្វើឱ្យជ្រួតជ្រាបនូវ «គីហ្សូណា» ឬចំណងមិត្តភាពដ៏ស្អិតរមួតរវាងប្រទេសយើងទាំងពីរ។

នាឱកាសនោះដែរ លោកបណ្ឌិតសភាចារ្យ ហង់ ជួនណារ៉ុន សូមថ្លែងអំណរគុណចំពោះស្ថានទូតជប៉ុន នៅក្នុងព្រះរាជាណាចក្រកម្ពុជា មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមូលនិធិជប៉ុនសម្រាប់មជ្ឈមណ្ឌលអាស៊ី សម្រាប់សហការរៀបចំព្រឹត្តិការណ៍ «មហោស្រពជប៉ុន-កម្ពុជា គីហ្សូណា ឆ្នាំ២០២២»។

លោករដ្ឋមន្ត្រីក្រសួងអប់រំ បានឱ្យដឹងថា ចាប់តាំងពីឆ្នាំ២០១២មក ទោះបីជាត្រូវបានដំណើរការក្នុងទម្រង់អនឡាញ ឬក្នុងទម្រង់ទីកន្លែងក៏ដោយ ពិធីបុណ្យ KIZUNA ផ្តល់ឱកាសឱ្យប្រជាជនកម្ពុជា និងប្រជាជនជប៉ុន ទទួលបានបទពិសោធន៍ពីភាពស្រស់ស្អាតនៃទម្រង់សិល្បៈបែបប្រពៃណី និងទំនើបនៃសិល្បៈខ្មែរ និងជប៉ុន ដោយនាំយកនូវការសម្តែងបែបទំនើប និងប្រពៃណីចម្រុះជាច្រើន។ ប្រទេសជប៉ុន-កម្ពុជា ដែលនឹងផ្តល់អត្ថប្រយោជន៍ដល់ទស្សនិកជន និងស្វែងយល់ពីសកម្មភាពសិក្សារួមគ្នាតាមរយៈសិល្បៈ និងសិល្បៈច្នៃប្រឌិត។

លោកបណ្ឌិតសភាចារ្យ ហង់ ជួនណារ៉ុន បានសម្តែងនូវការគាំទ្រយ៉ាងពេញទំហឹងចំពោះ «មហោស្រពជប៉ុន-កម្ពុជា គីហ្សូណា ឆ្នាំ២០២២» ព្រោះវារួមចំណែកដល់ការសម្រេចបាននូវចក្ខុវិស័យអភិវឌ្ឍន៍សេដ្ឋកិច្ចរបស់កម្ពុជា ហើយវាដើរតួនាទីក្នុងការប្រមូលផ្តុំមនុស្សពហុវប្បធម៌ រួមទាំងនិស្សិតកម្ពុជា និងជប៉ុនផងដែរ។

បើតាម លោក ឡុង ប៉ុណ្ណាស៊ីរីវត្ថ បានថ្លែងថា ព្រឹត្តិការណ៍ «ពិធីបើកមហោស្រពគីហ្សូណាជប៉ុន-កម្ពុជា២០២២» គឺជាសក្ខីភាពសបញ្ជាក់ពីកិច្ចសហប្រតិបត្តិការល្អ និងស៊ីជម្រៅរបស់ប្រទេសទាំងពីរជប៉ុន-កម្ពុជា លើវិស័យវប្បធម៌ និងវិចិត្រសិល្បៈ។ ពោលគឺទំនាក់ទំនងកម្ពុជា-ជប៉ុន គឺជាមិត្តភាពជិតស្និទ្ធតាំងពីអតីតកាល បច្ចុប្បន្ន និងឆ្ពោះទៅអនាគត។

លោកបានបន្តថា បើទោះបីជាមានការរីករាលដាលជំងឺកូវីដ១៩ ខ្លាំងយ៉ាងណាក៏ដោយ ក៏សកម្មភាពវប្បធម៌រវាងកម្ពុជា-ជប៉ុន នៅតែបន្តមានជាហូរហែរឥតដាច់ ហើយព្រឹត្តិការណ៍ Japan-Cambodia Kizuna គឺជាសកម្មភាពវប្បធម៌មួយក្នុងចំណោមសកម្មភាពវប្បធម៌ជាច្រើនទៀត និងមានសារៈសំខាន់ក្នុងការលើកស្ទួយកិច្ចសហប្រតិបត្តិការវប្បធម៌កម្ពុជា-ជប៉ុន៕

អ្នកនិពន្ឋ: ព័ត៌មានជាតិ