Pages

សូមស្វាគមន៍ WWW.SPS-NEWS.COM មានទទួល សេវាកម្មផ្សាយពាណិជ្ជកម្ម គ្រប់ប្រភេទ ចាងហ្វាងការផ្សាយ ទីស្នាក់ការកណ្តាល ភូមិតាកែវ ឃុំគរ ស្រុក ព្រៃឈ ខេត្តកំពង់ចាម ទំនាក់ទំនង Tel: 090 905 988 / 086 309 181


សូមស្វាគមន៍ គេហទំព័រ ស្ពាន សន្តិភាព មានទទួល សេវាកម្មផ្សាយពាណិជ្ជកម្ម គ្រប់ប្រភេទ ចាងហ្វាងការផ្សាយ ទីស្នាក់ការកណ្តាល ភូមិតាកែវ ឃុំគរ ស្រុក ព្រៃឈ ខេត្តកំពង់ចាម ទំនាក់ទំនង Tel: 090 905 988 / 086 309 181


Wednesday, June 30, 2021

ប្រធាន គ.វ.ក១៩ ៖ វីរុសបំប្លែងថ្មីឈ្មោះ អាល់ហ្វា បាននិងកំពុងតែចរាចរយ៉ាងសកម្មនៅកម្ពុជា ហើយមានគ្រោះថ្នាក់ជាងវីរុសធម្មតា ៥ដង ទៅ ៧ដង

ចំនួនអ្នកទស្សនា: Views

 ភ្នំពេញ: ក្នុងឱកាសអញ្ជើញនាំយកអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចំនួន ១០ ០០០ ០០០រៀល (ដប់លានរៀល) និងគ្រឿងឧបភោគបរិភោគមួយចំនួនទៀត ជូនដល់អ្នកស្ម័គ្រចិត្តចាក់វ៉ាក់សាំងកូវីដ-១៩ លេងរៀងទី៤លាន គឺលោក សូ សយ អាយុ៦៥ឆ្នាំ ជាអតីតយុទ្ធជន និងជាយុទ្ធជនពិការជើងឆ្វេង នៅភូមិប្រទាល ឃុំអណ្តូងទឹក ស្រុកបុទុមសាគរ ខេត្តកោះកុង នាព្រឹកថ្ងៃទី២៩ ខែមិថុនា ឆ្នាំ២០២១ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួង​សុខាភិបាល និងជាប្រធាន គ.វ.ក១៩ ក្នុងក្របខណ្ឌទូទាំងប្រទេស បានអំពាវនាវជាថ្មី ដល់បងប្អូនប្រជាពលរដ្ឋទាំងអស់ ត្រូវអនុវត្តវិធានការសុខាភិបាលនានា និងវិធានការ ០៣ការពារ-០៣កុំ ឱ្យបានម៉ត់ចត់បំផុត ព្រោះថាវីរុសបំប្លែងថ្មី ឈ្មោះដែលតា (B.1.167.2) ដែលបានរកឃើញជាបណ្តើរៗ នៅកម្ពុជា ហើយដែលមានសមត្ថភាពឆ្លងលឿនជាង និងធ្ងន់ធ្ងរជាង រង្វង់១៥ដង នៃវីរុសបំប្លែងថ្មីដទៃទៀត មានដូចជាវីរុសឈ្មោះ អាល់ហ្វា (B.117) ជាដើម។

លោកជំទាវបានសង្កត់ធ្ងន់ថា ៖ “ដោយឡែក វីរុសបំប្លែងថ្មី ឈ្មោះអាល់ហ្វានេះវិញ ហើយដែលត្រូវបានរកឃើញដំបូងកាលពីខែកុម្ភៈ ឆ្នាំ២០២១ និងត្រូវបានសន្មត់ថាមានពាក់ព័ន្ធនឹងព្រឹត្តិការណ៍សហគមន៍២០កុម្ភៈផងដែរនោះ បាននិងកំពុងចរាចរយ៉ាងសកម្មនៅក្នុង​ព្រះរាជាណាចក្រកម្ពុជាយើង។ វីរុសអាល់ហ្វានេះ ក៏មានសមត្ថភាពនៃការចម្លងបានលឿន ព្រមទាំងបង្ករគ្រោះថ្នាក់ធ្ងន់ធ្ងរដល់សុខ​ភាពអ្នកជំងឺផងដែរ គឺមានក្នុងរង្វង់ពី ៥ដង ទៅ ៧ដង ខ្លាំងជាងវីរុសកូវីដ-១៩ចាស់ ឬវីរុសដែលមិនទាន់បំប្លែងខ្លួន ខណៈនៅកម្ពុជាយើង​នៅពេលនេះ មានអ្នកជំងឺជាង ១០០នាក់ហើយដែលមានវិជ្ជមានពពួកបំប្លែងថ្មីអាល់ហ្វានេះ ហើយចំពោះដែលតាវិញ គឺមាន២២ករណី​ហើយដែលត្រូវបានរកឃើញត្រឹមតែមួយខែមិថុនានេះ”។

លោកជំទាវ បានបន្ថែមផងដែរ ដោយសារតែការចរាចរនៃវីរុសអាល់ហ្វានេះហើយ ទើបភាគច្រើននៃអ្នកជំងឺដែលវិជ្ជមានហើយចូល​សម្រាកពេទ្យ គឺមានសភាពធ្ងន់ធ្ងររួចជាស្រេចទៅហើយ។ ហេតុដូច្នេះហើយ បងប្អូនប្រជាពលរដ្ឋត្រូវតែចូលរួមអនុវត្តវិធានការការពារ​ខ្លួនឱ្យបានខ្ជាប់ខ្ជួនបំផុត មិនថាតែ ដែលតា អាល់ហ្វា ឬវីរុសកូវីដ-១៩ធម្មតាដទៃទៀតនោះទេ ព្រោះថានៅថ្ងៃមុខពពួកវីរុសនេះអាច​នឹងបំប្លែងខ្លួនបន្ថែមទៀត ដូចជាករណីវីរុសដែលតា ដែលនៅពេលនេះ លឺថាបានបំប្លែងទៅជា ដែលតាផ្លាស (Delta Plus) ជាដើម។

ឆ្លៀតក្នុងឱកាសនោះផងដែរ លោកជំទាវវេជ្ជបណ្ឌិត ក៏បានអំពាវនាវជាថ្មី និងដ៏ទទូច ដល់បងប្អូនប្រជាពលរដ្ឋទាំងអស់ ត្រូវបង្កើនការ​ប្រុង​ប្រយ័ត្នឱ្យបានខ្ពស់ជាងនេះ បន្តអនុវត្តវិធានការសុខាភិបាលឱ្យបានម៉ត់ចត់ជាងនេះ និងអនុវត្តអភិក្រម ០៣ការពារ-០៣កុំ ឱ្យបាន​ត្រឹមត្រូវជាងនេះ ដើម្បីកម្ពុជាចៀសផុតពីការវាយលុយកាន់តែធ្ងន់ធ្ងរជាងនេះ ជាពិសេសគឺពពួកបំប្លែងថ្មីនេះ។

គួររម្លឹកថា កម្ពុជាបានរកឃើញករណីវិជ្ជមានវីរុសកូវីដ-១៩ ដំបូងបំផុតកាលពីខែមករា ឆ្នាំ២០២០ ហើយគិតត្រឹមថ្ងៃទី២៩ ខែមិថុនា ឆ្នាំ២០២១នេះ មានករណីសរុបទូទាំងប្រទេសចំនួន ៤៩ ២៥៥នាក់ ជាសះស្បើយសរុបចំនួន ៤៣ ៤៧៣នាក់ និងមានករណី​មរណភាព​សរុបចំនួន ៥៧៥នាក់ហើយ ហើយអ្នកមរណភាពទាំង៥៧៥នាក់នេះ គឺបានចាប់ផ្តើមតាំងពីមានព្រឹត្តិការណ៍​សហគមន៍២០កុម្ភៈទាំងអស់៕ 

ឯកឧត្តម ឃួង ស្រេង អញ្ជើញជាអធិបតីក្នុងកិច្ចប្រជុំជាមួយអាជ្ញាធរខណ្ឌទាំង១៤

ចំនួនអ្នកទស្សនា: Views

 ភ្នំពេញ : នៅរៀលថ្ងៃទី២៩ ខែមិថុនា ឆ្នាំ២០២១ 

ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ អញ្ជើញជាអធិបតីក្នុងកិច្ចប្រជុំជាមួយអាជ្ញាធរខណ្ឌទាំង១៤ នាល្ងាចថ្ងៃទី២៩ ខែមិថុនា ឆ្នាំ២០២១ ស្តីពីការយកចិត្តទុកដាក់ខ្ពស់បំផុតដើម្បីបង្ការ និងទប់ស្កាត់ការរីករាលដាលជំងឺកូវីដ-១៩ ជាពិសេសទៅលើអាជីវករផ្សារបឹងកេងកង ដែលមកដល់រសៀលនេះ មានករណីវិជ្ជមានកូវីដ-១៩ ចំនួន ២៦៧នាក់ហើយ ។

Tuesday, June 29, 2021

ប្រជាពលរដ្ឋនៅក្នុងរាជធានីភ្នំពេញ ជិត២ម៉ឺននាក់ទៀត កំពុងបន្ដមកចាក់វ៉ាក់សាំងការពារកូវីដ-១៩លើកទី១ នៅទីតាំងទាំង១៤ ដែលបានកំណត់ដោយអាជ្ញាធរ

ចំនួនអ្នកទស្សនា: Views

 


ភ្នំពេញ : ថ្ងៃទី២៩ ខែមិថុនា ឆ្នាំ២០២១ ប្រជាពលរដ្ឋដែលរស់នៅក្នុងរាជធានីភ្នំពេញ បានបន្ដមកទទួលការចាក់វäក់សាំងលើកទី១ រយៈពេលពីរថ្ងៃមានជិត២ម៉ឺននាក់ហើយ ចាប់ពីថ្ងៃទី២៧ ខែមិថុនា និងនៅព្រឹកថ្ងៃទី២៨ ខែមិថុនា ឆ្នាំ២០២១ ក្រោយពីអាជ្ញាធររាជធានីភ្នំពេញ បានចេញសេចក្តីជូនដំណឹងកាលថ្ងៃទី២៥ ខែមិថុនា ឆ្នាំ២០២១ ស្តីពីកាលបរិច្ឆេទចុងក្រោយ នៃការចាក់វ៉ាក់សាំងជូនប្រជាពលរដ្ឋ នៅភូមិសាស្ត្ររាជធានីភ្នំពេញ ដោយចាប់ផ្តើមពីថ្ងៃ២៧ខែមិថុនា ដល់ថ្ងៃ០៨ ខែកក្កដា ឆ្នាំ២០២១ ។

ឯកឧត្តម ឃួង ស្រេង អភិបាលរាជធានីភ្នំពេញ និងជាអនុប្រធានគណៈកម្មការចំពោះកិច្ច ចាក់វ៉ាក់សាំងកូវីដ-១៩ តែងតែបានចុះធ្វើការត្រួតពិនិត្យទីតាំងចាក់វ៉ាក់សាំងជារឿយៗ និងបានជំរុញឱ្យក្រុមការងារ ក្រុមគ្រូពេទ្យ និងអាជ្ញាធរដែនដី សម្រុកចាក់វ៉ាក់សាំងនេះឱ្យបានលឿន និងបានគ្រប់គ្នាសម្រាប់អ្នករស់នៅរាជធានីភ្នំពេញ យ៉ាងយូរបំផុតក្នុងអំឡុងខែមិថុនា ឆ្នាំ២០២១ ស្របតាមការកំណត់របស់រាជរដ្ឋាភិបាល ដើម្បីកាត់ផ្តាច់ឱ្យបាននូវការឆ្លងរីករាលដាលជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ។

ប្រជាពលរដ្ឋនៅខណ្ឌច្បារអំពៅ ដែលបានមកចាក់វ៉ាក់សាំងប្រឆាំងកូវីដ-១៩ បាន ឱ្យដឹងថា ចំពោះការយឺតយ៉ាវ និងបានមកទទួលការចាក់វ៉ាក់សាំងនេះ ដោយសារតែនៅពេលអាជ្ញាធរអញ្ជើញឱ្យពួកគាត់មកចាក់នោះ ពួកគាត់មានជំងឺ និងមួយចំនួនទៀតជាប់ទៅស្រុកកំណើត ទើបអាក់ខានមិនបានមកទទួលការចាក់វ៉ាក់សាំងនេះ ។ ពួកគាត់ពិតជាអរគុណ ចំពោះអាជ្ញាធររាជធានីភ្នំពេញ ដែលបានពន្យារពេលការចាក់វ៉ាក់សាំង ចំពោះពួកគាត់ដែលមិនទាន់បានមកចាក់នាពេលកន្លងមក បានចាក់នៅពេលនេះ។

មន្ត្រីរដ្ឋបាលរាជធានីភ្នំពេញ បានឱ្យដឹងថា ចំពោះប្រជាពលរដ្ឋដែលមិនបានទទួល ការចាក់វ៉ាក់សាំងប្រឆាំងកូវីដ-១៩ នៅក្នុង១៣ខណ្ឌក្នុងរាជធានីភ្នំពេញ មានចំនួនសរុប ១៩.៣៩៩នាក់ ក្នុងនោះនៅខណ្ឌកំបូល នៅសល់ចំនួន ៩៨៧នាក់, ខណ្ឌពោធិ៍សែនជ័យ នៅសល់ចំនួន ៤.៩៨០នាក់, ខណ្ឌទួលគោក នៅសល់ចំនួន ១.២៩៧នាក់, ខណ្ឌ៧មករា នៅសល់ចំនួន ៧៥៥នាក់, ខណ្ឌដូនពេញ នៅសល់ចំនួន ៥២១នាក់ ខណ្ឌបឹងកេងកង នៅសល់ចំនួន ៧០២នាក់, ខណ្ឌចំការមន នៅសល់ចំនួន ២២២នាក់, ខណ្ឌដង្កោនៅសល់ចំនួន១.៨៨៧នាក់, ខណ្ឌជ្រោយចង្វា នៅសល់ចំនួន ២.៥៩០នាក់, ខណ្ឌឫស្សីកែវ នៅសល់ចំនួន៣០០នាក់, ខណ្ឌច្បារអំពៅ នៅសល់ចំនួន ១.៨៧៣នាក់, ខណ្ឌមានជ័យរួចរាល់អស់ហើយ, ខណ្ឌសែនសុខ នៅសល់ចំនួន ១.៧៦១នាក់, និងខណ្ឌព្រែកព្នៅ នៅសល់ចំនួន១.៥២៤នាក់។

សូមបញ្ជាក់ថា រដ្ឋបាលរាជធានីភ្នំពេញ កាលពីថ្ងៃទី២៥ ខែមិថុនា ឆ្នាំ២០២១ រដ្ឋបាលរាជធានី បានចេញសេចក្តីជូនដំណឹង ស្តីពីកាលបរិច្ឆេទចុងក្រោយ នៃការចាក់វ៉ាក់សាំងជូនប្រជាពលរដ្ឋ នៅភូមិសាស្ត្ររាជធានីភ្នំពេញ ដែលក្នុងសេចក្តីជូនដំណឹងនេះ បានបញ្ជាក់ថា ក្នុងក្របខ័ណ្ឌនៃយុទ្ធនាការជាតិចាក់វ៉ាក់សាំង ដោយអនុលោមតាមផែនការមេ សម្រាប់យុទ្ធ នាការចាក់វ៉ាក់សាំងបង្ការជំងឺកូវីដ-១៩ ដែលមានអនុគណៈកម្មការចំពោះកិច្ចចាក់វ៉ាក់សាំងកូវីដ-១៩ ជាសេនាធិការ និងដែលមានកិច្ចសហការពីក្រុមគ្រូពេទ្យ នៃកងយោធពលខេមរភូមិន្ទ ក្រសួងការពារជាតិ ក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ក្រុមគ្រូពេទ្យស្ម័គ្រចិត្តរបស់សម្តេចពិជ័យសេនា ទៀ បាញ់ ក្រុមគ្រូពេទ្យស្ម័គ្រចិត្ត ស.ស.យ.ក និងក្រុមគ្រូពេទ្យនៃអង្គភាពផ្សេងៗ បានដំណើរការចាក់វ៉ាក់សាំងជូនប្រជាពលរដ្ឋដែលមានអាយុពី១៨ឆ្នាំឡើងទៅ នៅរាជធានីភ្នំពេញបានយ៉ាងរលូន ស្របតាមជំហានកម្មវិធីការងារ ដែលបានគ្រោងទុក ហើយប្រជាពលរដ្ឋក៏បានស្ម័គ្រចិត្តយ៉ាងសស្រាក់សស្រាំ តម្រង់ជាជួរមកចាក់វ៉ាក់សាំង តាមគោលដៅ នៃខណ្ឌនីមួយៗ ដែលគិតមកដល់ថ្ងៃទី២៣ ខែមិថុនា ឆ្នាំ២០២១ បានចំនួន ១.៦៦២.៣៥៦នាក់ (ដូសទី១) និង ១.៤៩៨.៧៨៧នាក់ (ដូសទី២)។

ប៉ុន្តែទោះជាយ៉ាងនេះក្តី រដ្ឋបាលរាជធានីភ្នំពេញសង្កេតឃើញថា នៅមានប្រជាពលរដ្ឋមួយចំនួនតូចទៀត ពុំទាន់មកទទួលការចាក់វ៉ាក់សាំង នៅឡើយ។ ដើម្បីឈានទៅសម្រេចលទ្ធផលឱ្យបានជោគជ័យ១០០ភាគរយ ស្របតាមផែនការយុទ្ធសាស្ត្ររបស់គណៈកម្មការចាក់វ៉ាក់សាំង និងរាជរដ្ឋាភិបាល ដែលគ្រោងបិទបញ្ចប់យុទ្ធនាការចាក់វ៉ាក់សាំងជូនប្រជាពលរដ្ឋនៅរាជធានីភ្នំពេញ នៅសប្តាហ៍ទី១ ខែកក្កដា ឆ្នាំ២០២១នោះ រដ្ឋបាលរាជធានីភ្នំពេញបានអំពាវនាវដល់ប្រជាពលរដ្ឋដែលកំពុងរស់នៅស្នាក់នៅ ប្រកបអាជីវកម្មមុខរបរផ្សេងៗ នៅក្នុងភូមិសាស្ត្ររាជធានីភ្នំពេញ ដែលពុំទាន់បានទទួលការចាក់វ៉ាក់សាំង អញ្ជើញរួសរាន់មកចាក់វ៉ាក់សាំង ចាប់ពីថ្ងៃទី២៧ ខែមិថុនា រហូតដល់ថ្ងៃទី០៨ ខែកក្កដា ឆ្នាំ២០២១កុំបីខាន នៅតាមទីតាំងដែលបានកំណត់ក្នុងខណ្ឌទាំង១៤ ៕

គណបក្សប្រជាជនកម្ពុជាខេត្តកំពង់ឆ្នាំង ប្រារព្ធពិធីសំណេះសំណាល និងផ្សព្វផ្សាយប្រវត្តិគណបក្ស​ប្រជាជនកម្ពុជាខួបលើកទី៧០ ២៨ ខែមិថុនា ឆ្នាំ១៩៥១-២៨ ខែមិថុនា ឆ្នាំ២០២១

ចំនួនអ្នកទស្សនា: Views


កំពង់ឆ្នាំង៖ នៅរសៀលថ្ងៃទី២៨ ខែមិថុនា ឆ្នាំ២០២១នេះ នៅសាលប្រជុំស្នាក់ការគណបក្សប្រជាជនកម្ពុជាខេត្តកំពង់ឆ្នាំង បានប្រារព្ធពិធីសំណេះសំណាល និងផ្សព្វផ្សាយប្រវត្តិគណបក្សប្រជាជនsកម្ពុជាខួបលើកទី៧០ (២៨ ខែមិថុនា ឆ្នាំ១៩៥១-២៨ ខែមិថុនា ឆ្នាំ២០២១) ក្រោមអធិបតីភាពឯកឧត្តម ឈួរ ច័ន្ទឌឿន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តកំពង់ឆ្នាំង។

ដោយមានការអញ្ជើញចូលរួមពីឯកឧត្តមអនុប្រធានគណៈកម្មាធិការគណបក្សប្រជាជនកម្ពុជាខេត្ត ឯកឧត្តមលោកជំទាវសមាជិកអចិន្រ្តៃយ៍គណៈកម្មាធិការគណបក្សប្រជាជនកម្ពុជាខេត្ត ប្រធាន អនុប្រធានសាខាគណបក្សប្រជាជនកម្ពុជា មន្ទីរអង្គភាពជុំវិញខេត្តចូលរួមផងដែរ ៕ ដោយ៖ មន្ទីរព័ត៌មានខេត្តកំពង់ឆ្នាំង​ សម្រួលផ្សាយដោយ៖sps


Monday, June 28, 2021

ឯកឧត្តម ហ៊ុន ម៉ានិត ជំរុញអាជ្ញាធរខេត្តបន្ទាយមានជ័យ បង្កើនការយកចិត្តទុកដាក់គ្រប់គ្រងពលករខ្មែរ ត្រឡប់ពីប្រទេសថៃ ដើម្បីទប់ស្កាត់ការឆ្លងរីករាលដាលជំងឺកូវីដ១៩ចូលក្នុងសហគមន៍

ចំនួនអ្នកទស្សនា: Views

 


 ភ្នំពេញ: ថ្ងៃទី២៨ ខែមិថុនា ឆ្នាំ២០២១ ឯកឧត្ដម ហ៊ុន ម៉ានិត អគ្គនាយកស្រាវជ្រាវចារ កិច្ច ក្រសួងការពារជាតិ និងជាប្រធានអនុណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័ក បានធ្វើការក្រើនរម្លឹកដោយជំរុញ អាជ្ញាធរសមត្ថកិច្ចពាក់ព័ន្ធទាំងអស់ នៅខេត្តបន្ទាយមានជ័យ ត្រូវបង្កើនការយកចិត្តទុកដាក់ថែមទៀត លើការគ្រប់គ្រងពលករខ្មែរ ដែលឆ្លងដែនពីប្រទេសថៃ មកកម្ពុជាវិញ ដើម្បីទប់ស្កាត់ការឆ្លងរីករាលដាល នៃជំងឺកូវីដ-១៩ ចូលក្នុងសហគមន៍ ខណៈប្រទេសថៃកំពុងរាតត្បាតយ៉ាងខ្លាំង នូវជំងឺដ៏កាចសាហាវនេះ។

ការថ្លែងជំរុញយ៉ាងដូច្នេះ បានធ្វើឡើងនៅក្នុងឱកាសឯកឧត្តម ហ៊ុន ម៉ានិត រួមនឹងក្រុមការងារបានជួបពិភាក្សាការងារ ជាមួយអាជ្ញាធរសមត្ថកិច្ចពាក់ព័ន្ធខេត្តបន្ទាយមានជ័យ ក្រោមការដឹកនាំឯកឧត្តម អ៊ុំ រាត្រី អភិបាលខេត្ត នៅច្រកតំបន់អូរបីជាន់ ឃុំអូរបីជាន់ ស្រុកអូរជ្រៅ កាលពីថ្ងៃ៣រោច ខែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃអាទិត្យ ទី២៧ ខែមិថុ នា ឆ្នាំ២០២១នេះ ដើម្បីរៀបចំជាគោលការណ៍អនុវត្តន៍ចំពោះមុខ ក្នុងនោះផ្តោតសំខាន់លើ វិធានការត្រៀមទទួលពលករខ្មែរ ដែលឆ្លងដែនពីប្រទេសថៃ ចូលមកក្នុងប្រទេសវិញ កាន់តែ មានចំនួនច្រើនឡើង ។ ជាពិសេសក្នុងការអនុវត្តគោលការណ៍ថ្មី ដែលតម្រូវឱ្យធ្វើតេស្តរហ័ស លើពលករគ្រប់រូប ដែលបានឆ្លងដែនចូលមក និងការធ្វើចត្តាឡីស័កនៅនឹងកន្លែងតែម្តង។

ឯកឧត្តម ហ៊ុន ម៉ានិត ក៏បានស្នើឱ្យរដ្ឋបាលខេត្តបន្ទាយមានជ័យ ត្រូវរៀបចំផែនការ សកម្មភាព និងរៀបចំទីតាំងមណ្ឌលចត្តាឡីស័ក ក៏ដូចជាលើកសំណើពាក់ព័ន្ធនឹងតម្រូវការ សម្ភារ បរិក្ខារ បច្ចេកទេសដាក់ជូនគណៈកម្មការ និងអនុគណៈកម្មការថ្នាក់ជាតិ ដើម្បីជាយន្ត ការគាំទ្រដល់រដ្ឋបាលខេត្ត សំដៅធ្វើឱ្យសកម្មភាពប្រយុទ្ធជំងឺកូវីដ-១៩ទទួលបានប្រសិទ្ធភាព ខ្ពស់។

ជាមួយនោះឯកឧត្តម ហ៊ុន ម៉ានិត ក៏បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងរបស់អាជ្ញាធរសមត្ថកិច្ចគ្រប់ជាន់ថ្នាក់ ទាំងអស់នៅខេត្តបន្ទាយមានជ័យ ដែលបានរួមគ្នាក្នុងការរៀបចំគ្រប់គ្រងពលករ និងការប្រយុទ្ធទប់ស្កាត់ការរីករាលដាល នៃជំងឺកូវីដ-១៩ ចូលក្នុងសហគមន៍នោះ។

ក្នុងឱកាសនោះឯកឧត្តម ហ៊ុន ម៉ានិត និងប្រតិភូបានអញ្ជើញពិនិត្យមើលទីតាំង នៃការគ្រប់គ្រង ការពិនិត្យយកសំណាកបងប្អូនពលករខ្មែរ ដែលត្រឡប់ពីប្រទេសថៃ នៅតំបន់អូរបីជាន់ ដែលក្រុមការងារចម្រុះខេត្ត បាននិងកំពុងបំពេញបេសកកម្មការងារ ដើម្បីប្រយុទ្ធទប់ ស្កាត់នឹងជំងឺកូវីដ-១៩ និងតម្រូវការចាំបាច់បន្ថែមទៀត សំដៅធ្វើយ៉ាងណាទប់ស្កាត់ឱ្យខាង តែបាន នូវការចម្លងជំងឺកូវីដ-១៩ចូលក្នុងសហគមន៍៕



អ្នកជំនាញអារ្យធម៌ខ្មែរ៖ តើថ្ងៃទី២៨ មិថុនា នៃទិវាគម្រប់ខួប៧០ឆ្នាំរបស់គណបក្សប្រជាជនកម្ពុជា បានឆ្លងកាត់ដំណាក់កាលប្រវត្ដិសាស្រ្ដខ្មែរអ្វីខ្លះ?

ចំនួនអ្នកទស្សនា: Views

 (ភ្នំពេញ)៖ នៅថ្ងៃទី២៨ ខែមិថុនានេះ គឺ

ជាទិវាគម្រប់ខួប៧០ឆ្នំារបស់គណបក្សប្រជាជនកម្ពុជា ដើម្បីបង្ហាញអំពីសកម្មភាពនយោបាយ និងសមិទ្ធិផលធំៗជូនជាតិ មាតុភូមិ និងប្រជាពលរដ្ឋទូទំាងព្រះនគរ ក្នុងការដឹកនាំប្រកបដោយភាពក្លាហាន ឥតរាថយនៅគ្រប់ដំណាក់កាលធំៗនៃប្រវត្តិសាស្ដ្រខ្មែរ។

តើថ្ងៃទី២៨ មិថុនា នៃទិវាគម្រប់ខួប៧០ឆ្នាំរបស់គណបក្សប្រជាជនកម្ពុជា បានឆ្លងកាត់ដំណាក់កាលប្រវត្ដិសាស្រ្ដខ្មែរអ្វីខ្លះ?

អ្នកជំនាញអារ្យធម៌ខ្មែរ លោក រត្ន័ សណ្ដាប់ បានថ្លែងរៀបរាប់ថាចំពោះថ្ងៃទី២៨ ខែមិថុនានៃទិវាគម្រប់ខួប៧០ឆ្នំា របស់គណបក្សប្រជាជនកម្ពុជាដ៏ប្រពៃថ្លៃថ្លានាពេលនេះ បើនិយាយពីសាវតារគឺជាគណបក្សមួយដែលមានវ័យចំណាស់ជាងគេ ក្នុងចំណោមគណបក្សនយោបាយនានាក្នុងព្រះនគរយើង ក៏ដូចជាក្នុងតំបន់ផងដែរ។

តាមរយ:សាវតារនេះ គណបក្សបានឆ្លងកាត់ពុះពារឧបសគ្គច្រើនរាប់មិនអស់ ក្នុងដំណាក់កាលប្រវត្ដិសាស្រ្ដខ្មែររហូតឈានដល់ប្រទេសមានសន្តិភាព និងការអភិវឌ្ឍប្រកបដោយមោទនភាពដូចយើងឃើញបច្ចុប្បន្ននេះ។

បើហេតុនេះបើឈរលើសាវតារនេះ គណបក្សដែលបានឆ្លងកាត់ដំណាក់កាលប្រវត្ដិសាស្រ្ដនោះគឺ៖
១៖ ចំពោះគណប្រជាជនកម្ពុជាដែលបានចាប់បដិសន្ធិនៅថ្ងៃទី២៨ ខែមិថុនា ឆ្នំា១៩៥១ កាលពី៧០ឆ្នំាមុនមកនេះ គឺមានឈ្មោះដើមថា «បក្សប្រជាជនបដិវត្តន៍ខែ្មរ -khmer People's Revolutionnary Party» ជាចលនាតស៊ូបណ្ដេញពួកអាណានិគមនិយមបារំាងចេញពីកម្ពុជា ដោយស្របទៅតាមរាជតម្រិះសម្ដេចឪ ព្រះបរមរតនកោដ្ឋ ព្រះបិតាឯករាជ្យជាតិខ្មែរជាទីគោរពសក្ការ:ដ៌ខ្ពង់ខ្ពស់បំផុតនៃយើង ដែលបានធ្វើព្រះរាជបូជនីយកិច្ចទាមទារឯករាជ្យនៅថ្ងៃទី៩ ខែវិច្ឆិកា ឆ្នំា១៩៥៣ នាសម័យនោះផងដែរ។

បានសេចក្ដីថាចំពោះចលនាតស៊ូនេះយើងអាចហៅថា «ពហុចលនា» ពីព្រោះមាននិន្នាការមនោគមន៍វិជ្ជាផ្សេងៗគ្នា ប៉ុន្ដែមានទិសដៅតែមួយគឺការរំដោះប្រទេសចេញ ពីពួកអាណានិគមនិយមបារំាង។ ដោយហេតុថាចលនាតស៊ូនេះបានសហការណ៍ជាមួយបណ្ដាលចលនាតស៊ូនៃប្រទេសវៀតណាម និងលាវ ដែលមានគោលនយោបាយ បណ្ដេញពួកអាណានិគមនិយមបារំាងចេញពីប្រទេសរៀងៗខ្លួនដូចគ្នាផងដែរ។

បានន័យថានៅគ្រានោះចលនាតស៊ូនេះគឺស្របទៅតាមស្ថានភាពភូមិសាស្រ្ដនយោបាយ និងកាល:ទេសស្រុកទេស។ ម្យ៉ាងទៀតជាអ្នកភូមិផង របងជាមួយគ្នាហើយមានសត្រូវរួមនោះកិច្ចសហប្រតិបត្ដិការគឺជាការចំាបាច់ផងដែរ។

ដោយឈរលើជំហរចលនាតស៊ូនេះ បក្សប្រជាជនបដិវត្ដន៍ខ្មែរបានបង្កើតចលនាតស៊ូកងទ័ពមានឈ្មោះថា"កងកម្លំាងប្រដាប់អាវុធបដិវត្ដន៍ឯកភាពរបស់កម្ពុជា" ដែលបង្កើតទ្បើងនៅថ្ងៃទី១៩ ខែមិថុនា ឆ្នំា១៩៥១ នៅស្រុកស្រែអំបិល ខេត្ដកំពត ដែលមានលោក ទូ សាមុតជាមេបញ្ជាការ ។ រហូតមានកិច្ចព្រមព្រៀងទីក្រុងហ្ស៊ីណែវនាខែមិថុនា ឆ្នំា១៩៥៤ ពោល៨ខែបន្ទាប់ពីឯករាជ្យគឺចលនាតស៊ូត្រូវបានរំសាយដើម្បីឲ្យស្របតាមប្រទេសឯករាជ្យ ហើយបានប្រែទិសដៅពីការតស៊ូប្រដាប់អាវុធមកជានយោបាយវិញ។

២៖ ក្នុងពេលប្រទេសធ្លាក់ក្នុងភ្លើងសង្គ្រាមដោយការទម្លាក់គ្រប់បែកពីបរទេសឈ្លានពានពីឆ្នាំ ១៩៧០-១៩៧៥ ពិសេសប្រទេសជាតិធ្លាក់ក្នុងគ្រោះមហន្តរាយ របបប្រល័យពូជសាសន៍ពីឆ្នំា១៩៧៥-១៩៧៩ គណបក្សបានដឹកនាំការតស៊ូ ដើម្បីវាយផ្តួលរំលំរបបដ៏យង់ឃ្នងនេះ រហូតទទួលបានជោគជ័យជាប្រវត្តិសាស្ត្រ នៅថ្ងៃទី៧ មករា ឆ្នាំ១៩៧៩ ដោយបានរំដោះប្រទេសជាតិនិងសង្រ្គោះអាយុជីវិតប្រជាជនបានទាន់ពេលវេលា ដោយនាំមកនូវសិទ្ធិសេរីភាព ប្រជាធិបតេយ្យ និងសេចក្តីថ្លៃថ្នូរជូនប្រជាជនវិញ។

៣៖ អ្វីដែលសាធារណ:មតិជាតិនិងអន្ដរជាតិ ចងចំាមិនអាចបំភ្លេចបាននោះ គឺកិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ តុលា ឆ្នំា១៩៩១ ដើម្បីដោះស្រាយបញ្ចាប់ជម្លោះរវាងខ្មែរនិងខ្មែរ ដែលជាសមិទ្ធផលផ្ដើមចេញពីការចរចានយោបាយរវាងឥស្សរជនខ្មែរដ៏កំពូលពីររូបគឺ សម្ដេចព្រះនរោត្ដម សីហនុ ព្រះបរមរតនកោដ្ឋ ដែលជាព្រះប្រមុខតំណាងឲ្យក្រុមខ្មែរត្រីភាគីជាយដែន និងសម្ដេចតេជោ ហ៊ុន សែន តំណាងឱ្យរដ្ឋាភិបាលក្នុងប្រទេស។ ហើយជាពិសេសនៅចុងឆ្នាំ១៩៩៨ ក្រោមនយោបាយឈ្នះ-ឈ្នះ របស់សម្ដេចតេជោ បាននំាកម្ពុជាស្គាល់នូវសន្តិភាពពេញលេញទូទំាងព្រះនគរ បន្ទាប់ពីការធ្លាក់ចុះនូវអារ្យធម៌អង្គរប្រមាណ៥០០ឆ្នំាមកនេះ។

លោក រត្ន័ សណ្ដាប់ បន្ដថាបើដូចនេះចំពោះថ្ងៃទី២៨ មិថុនា នៃទិវាគម្រប់ខួប៧០ឆ្នាំរបស់គណបក្សប្រជាជនកម្ពុជាដ៏ប្រពៃថ្លៃថ្លានេះយើងជាប្រជាពលរដ្ឋ គួរតែចងចាំទុកជាសាវតារជាតិ ពីព្រោះបាននំាសន្ដិភាពនិងការអភិវឌ្ឍគ្រប់បែបយ៉ាងជូនព្រះនគរ។

ដោយឈរលើគុណតម្លៃទំាងនេះគណបក្សប្រជាជនកម្ពុជា គឺជាខ្នងបង្អែកដ៏រឹងមាំ ក្នុងការការពាររដ្ឋធម្មនុញ្ញ របបរាជានិយម និង ស្ថិរភាពនយោបាយ ដោយទប់ស្កាត់ឧបាយកលបដិវត្តន៍ពណ៌គ្រប់បែបយ៉ាងដែលរុញច្រានកម្ពុជាឲ្យឃ្លាតចេញពីមាគ៌ាប្រជាធិបតេយ្យ និងនីតិរដ្ឋ។

បើដូច្នេះខេមរជនខ្មែរត្រូវសិក្សាស្វែងយល់ប្រវត្ដិសាស្រ្ដរបស់ខ្លូនឲ្យបានច្បាស់លាស់ ដើម្បីជៀសវាងកុំឲ្យធ្លាក់ក្នុងសេចក្ដីវិនាសដូចអតីតកាលមុនៗទៀត ពិសេសត្រូវជៀសវាងដាច់ខាតនូវការផ្លាស់ប្ដូររបបនយោបាយ៕








Saturday, June 26, 2021

វ៉ាក់សាំងស៊ីណូវ៉ាក់ ១លានដូសទៀតបានដឹកពីចិន មកដល់កម្ពុជាហើយ ខណៈថ្ងៃទី២៨ ខែមិថុនា វ៉ាក់សាំង១លានដូសទៀតក៏នឹងមកដល់ផងដែរ

ចំនួនអ្នកទស្សនា: Views

 


(ភ្នំពេញ)៖ វ៉ាក់សាំងស៊ីណូវ៉ាក់ចំនួន ១លានដូសទៀត ដែលកម្ពុជាបញ្ជាទិញនោះបានដឹកពីប្រទេសចិន មកដល់អាកាសយានដ្ឋានអន្តរជាតិភ្នំពេញ នៅវេលាម៉ោងប្រមាណ ១០ព្រឹកថ្ងៃសៅរ៍ ទី២៦ ខែមិថុនា ឆ្នាំ២០២១នេះ។ នេះជាវ៉ាក់សាំងដែលដឹកមកដល់ប្រទេសកម្ពុជាជើងទី៣ ហើយសម្រាប់ខែមិថុនា។

ដោយឡែកនៅថ្ងៃទី២៨ ខែមិថុនា ដដែលនេះ វ៉ាក់សាំង ១លានដូសទៀត នឹងដឹកមកដល់ប្រទេសកម្ពុជាផងដែរ។ សរុបទៅត្រឹមខែមិថុនា កម្ពុជាទទួលបានវ៉ាក់សាំងពីក្រុមហ៊ុនចិន រហូតដល់ទៅ ៥លានដូស។

លោកស្រី យក់ សម្បត្តិ បានថ្លែងឲ្យដឹងថា នៅខែកក្កដាខាងមុខវ៉ាក់សាំងប្រមាណ ៣លានដូសទៀត ក៏នឹងត្រូវដឹកពីប្រទេសចិន មកកាន់កម្ពុជាផងដែរ។

វ៉ាក់សាំងបានក្លាយទៅជាវិធានការយុទ្ធសាស្ត្ររបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ១៩ និងជួយការពារអាយុជីវិតប្រជាពលរដ្ឋពីជំងឺឆ្លងសាកលមួយនេះ។ វត្តមានវ៉ាក់សាំងជាបន្តបន្ទាប់នេះ នឹងជួយឱ្យកម្ពុជាសម្រេចផែនការចាក់វ៉ាក់សាំងជូនប្រជាពលរដ្ឋប្រមាណ ១៣លាននាក់ ឱ្យបានលឿន និងទៅតាមការគ្រោងទុក។

បូករួមទាំងវ៉ាក់សាំងដែលមកដល់កម្ពុជានៅក្នុងសប្តាហ៍នេះ កម្ពុជាទទួលបានវ៉ាក់សាំងសរុបជាង ១១លានដូស លើចំនួនវ៉ាក់សាំងក្នុងផែនការប្រមាណ ២៣លានដូស។ តាមរយៈវត្តមានវ៉ាក់សាំងទាំងនេះ រាជរដ្ឋាភិបាលកម្ពុជា បាននឹងកំពុងពន្លឿនលើការងារចាក់វ៉ាក់សាំងវ៉ាក់សាំងផងដែរ។

ក្រៅតែពីរាជធានីភ្នំពេញ បច្ចុប្បន្នរាជរដ្ឋាភិបាលកម្ពុជា បាននិងកំពុងពង្រីកការចាក់វ៉ាក់សាំងទៅកាន់ខេត្តកណ្តាល ព្រះសីហនុ កោះកុង កំពង់ស្ពឺ និងតាកែវផងដែរ។

គិតពីថ្ងៃទី១០ ខែកុម្ភៈ ដល់ត្រឹមថ្ងៃទី២៥ ខែមិថុនា កម្ពុជា ចាក់វ៉ាក់សាំងជូនប្រជាពលរដ្ឋបានជាង ៣.៨លាននាក់ស្មើនឹងជាង ៣៨ភាគរយហើយ។

វ៉ាក់សាំងដែលកម្ពុជាទទួលបានសម្រាប់ចាក់ជូនប្រជាពលរដ្ឋនេះ ភាគច្រើនបំផុតជាវ៉ាក់សាំងពីប្រទេសចិន។ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា វត្តមានវ៉ាក់សាំងចិន នៅកម្ពុជានេះ កើតមានក្រោមចំណងទំនាក់ទំនងល្អ និងស្អិតល្មួតរវាងកម្ពុជា និងចិន ហើយជាស្មារតីរួមគ្នាដ៏មុតមាំមួយរវាងប្រទេសទាំងពីរក្នុងការយកឈ្នះលើជំងឺកូវីដ១៩។

រដ្ឋាភិបាលចិន ធ្លាប់បានប្រកាសបង្ហាញនូវជំហរមុតមាំរបស់ខ្លួនជួយកម្ពុជាប្រយុទ្ធនឹងជំងឺកូវីដ១៩នេះ រហូតទទួលបានជោគជ័យ។ លោក វ៉ាង វិនធាន ឯកអគ្គរដ្ឋទូតចិន ធ្លាប់បានគូសបញ្ជាក់ថា ចិន និងកម្ពុជាជាបងប្អូនល្អនឹងគ្នា ដែលប្រៀបដូចដៃ និងជើង គឺជាមិត្តល្អនឹងគ្នា ដែលតែងជួយគ្នាទៅវិញទៅមក។ ដរាបណាជំងឺកូវីដនៅក្នុងប្រទេសកម្ពុជាមិនទាន់បញ្ចប់ ការផ្តល់ជំនួយរបស់ចិនមកកាន់ប្រទេសកម្ពុជាក៏មិនអាចបញ្ឈប់បានឡើយ។ ក្នុងការប្រយុទ្ធប្រឆាំងនឹងជំងឺវីរុសកូវីដ ប្រជាជនចិនបន្តគាំទ្រជាមួយប្រជាជនកម្ពុជាជានិច្ច៕



សៀវភៅ «កំពូលអ្នកយុទ្ធសាស្រ្តវ័យក្មេងនៅអាស៊ី» ស្តីពីជីវិតសម្តេច ហ៊ុន សែន លើសមរភូមិចរចាសន្តិភាព នឹង ត្រូវ បោះ ពុម្ព ឆាប់ៗនេះ

ចំនួនអ្នកទស្សនា: Views

 (ភ្នំពេញ): ថ្ងៃទី២៦ ខែមិថុនា ឆ្នាំ២០២១ យោងតាមលោក ពៅ សុខ ទីប្រឹក្សាផ្ទាល់ សម្តេចតេជោនាយករដ្ឋមន្ត្រី ហ៊ុន សែន បានមានប្រសាសន៍ឱ្យអ្នក សារព័ត៌មាន ដឹងថា សៀវភៅ «កំពូលអ្នកយុទ្ធសាស្ត្រវ័យក្មេង» ស្តីពីជីវិតសម្តេច ហ៊ុន សែន ក្នុងដំណើរចរចា ស្វែង រក សន្តិភាព សម្រាប់ប្រទេសកម្ពុជា អំឡុងឆ្នាំ១៩៨៧ ដល់ឆ្នាំ១៩៩៣ នឹងត្រូវបោះ ពុម្ពឆាប់ៗ នេះ។

លោក ពៅ សុខ បានបញ្ជាក់ឱ្យដឹងទៀតថា អ្វីដែលជាភាពអស្ចារ្យរបស់សម្តេច ហ៊ុន សែន នៅក្នុងសៀវភៅនេះ គឺ ទី១ ទោះបីនៅពេលនោះ សម្តេចទើបតែមានអាយុ៣៦ឆ្នាំ ប៉ុន្តែ សម្តេច បានធ្វើឱ្យព្រះករុណា ព្រះបាទ នរោត្តម សីហនុ យល់ព្រម ទទួល ជួបចរចាជាលើកដំបូង និង ធ្វើ ឱ្យព្រះករុណា មានការភ្ញាក់ផ្អើល កោតសរសើរក្រៃលែងថា សម្តេច ហ៊ុន សែន ជាមនុស្សឆ្លាតវាងវៃ ខណៈពីដំបូងឡើយ ព្រះអង្គបានរារែក និងហាក់រើសអើងថា ព្រះអង្គមិនគួរបន្ទាប ព្រះកាយមកជួបចរចា ជាមួយសម្តេច ហ៊ុន សែន ដែលមិនដឹងជាមនុស្សចេញមកពីប្រភពណា និងមានចំណេះ ដឹងកម្រិតណា? ទី២ តាមរយ:ការ ចរចាលើក ដំបូងនេះ និងតាមរយៈពី សារព័ត៌មានល្បី ៗរបស់ ពិភព លោក សម្តេច ហ៊ុន សែន បានធ្វើឱ្យពិភពកលោកក្រើកឡើង និង ស្គាល់ ពី កិត្តិនាមរបស់សម្តេច បន្ទាប់ ពី ស្ងប់ ស្ងៀមជាយូរមកហើយ ស្តី ពីបញ្ហាជម្លោះនៅ កម្ពុជា ដែលកាលពីមុនមក កិត្តិនាម កិត្តិសព្ទរបស់សម្តេច មិនត្រូវបានគេស្គាល់ ឡើយ។ ក្នុងចំ ណោមសារព័ត៌មានល្បីៗមួយចំនួន ដូចជា ប៊ីប៊ីស៊ី អាអេហ្វប៉េ ស៊ីអិនអិន សុទ្ធតែកោតសរសើរថា សម្តេច ហ៊ុន សែន ជា មនុស្ស ឆ្លាត និងជានាយករដ្ឋមន្រ្តីវ័យក្មេង ជា ងគេលើលោក។ នេះជាយុទ្ធសាស្រ្តមួយ ក្នុងចំណោមយុទ្ធ សាស្រ្ត ជាច្រើនទៀត ដែលសម្តេច ហ៊ុន សែន បានបង្កើតឡើង ដើម្បីសន្តិភាព និងផលប្រយោជន៍ជាតិ និង តំបន់ ទាំង មូល។

លោកទីប្រឹក្សា និងជាអ្នករៀបរៀងសៀវភៅនេះ បានឱ្យដឹង ទៀត ថា ក្នុងសៀវភៅ« កំពូលអ្នកយុទ្ធ សាស្រ្តវ័យក្មេង» នេះ មានរៀបរាប់អំពីយុទ្ធសាស្រ្តនៃការចរចា របស់សម្តេច ហ៊ុន សែន និងឧបសគ្គនានារាប់ មិនអស់ ក្នុងដំណើរ ការចរចាចន្លោះពីថ្ងៃទី០២ ខែធ្នូ ឆ្នាំ១៩៨៧ ទម្រាំឈានដល់កិច្ច ព្រម ព្រៀងប៉ារីស២៣តុលា ១៩៩១ និងការបោះ ឆ្នោតឆ្នាំ១៩៩៣ ។

លោក ពៅ សុខ អះអាង ថា ប្រសិនបើមិនមែនតួអង្គចរចា មិនមែនជាសម្តេចហ៊ុន សែន ឬពីក្រៅពីសម្តេច ហ៊ុន សែន ប្រហែលជាគេមិនប ន្តការចរចាជាមូយត្រីភាគីទៀតទេ ព្រោះការ ចរចាពោរពេញទៅភាពស្មុគស្មាញ ឧបសគ្គ រាប់មិនអស់ ដោយសារតែកលឧបាយ របស់អ្នកនយោបាយជើងចាស់មួយចំនួន ក្នុងនោះមានលោក ខៀវ សំផន លោក សឺន សានផងដែរ។ ប៉ុន្តែ ដោយសារមនសិការស្រលាញ់ ស្នេហាជាតិ ស្នេហាប្រជាជន ចង់បានសន្តិភាព ជូន ជាតិមាតុភូមិ ដែលរងខ្ទេចខ្ទាំដោយសារសង្រ្គាមយូរមកហើយនោះ សម្តេច ហ៊ុន សែន បានដើរតួ ជាតួអង្គ បញ្ចុះ បញ្ចូល(ឡប់ប៊ី)គ្រប់ភាគី គ្រប់ប្រទេស ដែលពាក់ព័ន្ធឱ្យគេយល់ពីការចង់បានរបស់សម្តេច ឱ្យគេយល់ពីការ ឈឺចាប់ និងទុក្ខវេទនា របស់ប្រជាជនកម្ពុជា យល់ពីតម្លៃសន្តិភាព និងយល់ព្រមចូលតុចរចា ខណៈពេលនោះ សម្តេចហ៊ុន សែន មាន ប្រទេស ទាំងមូល មាន ប្រជាជនជាង៨លាននាក់គាំទ្រ និងត្រូវគ្រប់គ្រង។

លោកទីប្រឹក្សា បញ្ជាក់ទៀតថា អានសៀវភៅនេះ គេនឹងដឹងថា តើសម្តេច ហ៊ុន សែន បានប្រើយុទ្ធសាស្រ្តអ្វីខ្លះ ដើម្បី ធ្វើឱ្យសម្តេចជោគជ័យលើសមរភូមិចរចាសន្តិភាព និងតើសម្តេចជួបឧបសគ្គអ្វីខ្លះ? ស្មុគស្មាញបែបណា? សម្តេច អត់ធ្មត់ និងដោះស្រាយបញ្ហាបែបណា? មុន នឹងកម្ពុជា ទទួលបានសន្តិភាពពេញលេញ ដូចបច្ចុប្បន្ន៕ 

Friday, June 25, 2021

ខេត្តសៀមរាប រកឃើញអ្នកវិជ្ជមានជំងឺកូវីដ១៩ ចំនួន៤៩នាក់ ជាសះស្បើយ៦២នាក់ និងស្លាប់ ១នាក់ នៅថ្ងៃទី២៤ ខែមិថុនា

ចំនួនអ្នកទស្សនា: Views

 


សេចក្តីប្រកាសព័ត៌មានរបស់ខេត្ត បានបញ្ជាក់ថា អ្នករកឃេីញកេីតជំងឺកូវីដ១៩នេះ ករណីទី១ ដល់ទី៥ ជាករណីពាក់ព័ន្ធនឹងការឆ្លងរាលដាលជំងឺកូវីដ-១៩ ក្នុងសហគមន៍ ដែលមានប្រភពដើមមកពីស្រុកជីក្រែង។

ករណីទី៦ ដល់ទី៣៧ ជាករណីមានប្រភពចម្លងចេញពីផ្សារលើធំថ្មី, ករណីទី៣៨ ដល់ករណីទី៤១ ជាគឺជាករណីពុំទាន់អាចសន្និដ្ឋានពីប្រភពចម្លងច្បាស់លាស់នៅឡើយ។

ចំពោះករណីទី៤២ និងទី៤៣ ជាអ្នកធ្វើដំណើរមកពីខេត្តប៉ៃលិន, ករណីទី៤៤ ជាករណីមានប្រភពចម្លងចេញពីភោជនីយដ្ឋាន ហេង ហេង ២ និងករណីទី៤៥ ជាអ្នកធ្វើដំណើរមកពីខេត្តស្ទឹងត្រែង មករកសេវាព្យាបាលនៅមន្ទីរពេទ្យជ័យវរ្ម័នទី៧ ដោយមានអាការៈសង្ស័យ ក្រុមគ្រូពេទ្យបានយកសំណាកស្រាវជ្រាវរកមេរោគកូវីដ-១៩ ទទួលបានលទ្ធផលវិជ្ជមាន។

ដោយឡែក ករណីទី៤៦ ដល់ទី៤៨ ជាករណីមកពីខេត្តបន្ទាយមានជ័យ និងករណីទី៤៩ គឺជាប្រជាពលរដ្ឋដែលត្រឡប់មកពីប្រទេសថៃ មកដល់ខេត្តសៀមរាប ហើយជាករណីសង្ស័យ ត្រូវបានក្រុមគ្រូពេទ្យដាក់ឱ្យធ្វើចត្តាឡីស័ក នៅវិទ្យាល័យសម្ដេចឪ។

សម្រាប់អ្នកជាសះស្បើយទាំង៦២នាក់ ក្រុមគ្រូពេទ្យបានអនុញ្ញាតឱ្យចេញពីមន្ទីរពេទ្យបង្អែកខេត្ត និងមន្ទីរពេទ្យបង្អែកស្រុកសូទ្រនិគម ត្រឡប់ទៅលំនៅឋានវិញ ដោយត្រូវបន្តការធ្វើចត្តាឡីស័ករយៈពេល១៤ថ្ងៃ។

អ្នកវិជ្ជមានជំងឺកូវីដ-១៩ ដែលស្លាប់មានឈ្មោះ ឌុច ណាវី ភេទស្រី អាយុ៧២ឆ្នាំ អាសយដ្ឋាននៅភូមិចុងកៅស៊ូ សង្កាត់ស្លក្រាម ក្រុងសៀមរាប ដែលបានរកឃើញវិជ្ជមានជំងឺកូវីដ-១៩ នៅថ្ងៃទី២៤ ខែមិថុនា ឆ្នាំ២០២១ វេលាម៉ោង១៤៖១៥នាទី និងបានស្លាប់ នៅថ្ងៃទី២៤ខែមិថុនា ឆ្នាំ២០២១ វេលាម៉ោង១៤៖២០នាទី ដោយជំងឺរលាកសួត បង្កដោយមេរោគកូវីដ-១៩។

សូមបញ្ជាក់ថាមកទល់ពេលនេះ ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន៧៥១នាក់ ។ ក្នុងនោះបានព្យាបាលជាសះស្បេីយចំនួន២៦៧នាក់ ស្លាប់៩នាក់ និង៤៧៥នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក។

រដ្ឋបាលខេត្តសៀមរាប អំពាវនាវដល់ប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានខាងលើ រួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនេះ។

ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។

រដ្ឋបាលខេត្តសៀមរាប សង្ឃឹមយ៉ាងមុតមាំថា ប្រជាពលរដ្ឋទាំងអស់ ចូលរួមអនុវត្តឱ្យបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាល៕