ខ្នងផ្ទះទី២២៨ អំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ត្រូវបានប្រគល់ជូនគ្រួសារអតីតយុទ្ធជនពលី នៅឃុំមានជ័យ

នៅរសៀលថ្ងៃច័ន្ទ ១២កើត ខែមិគសិរ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៥ ខែធ្នូ ឆ្នាំ២០២២ ឧត្តមសេនីយ៍ទោ សោម ស៊ុន មេបញ្ជា ការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការី រួមជាមួយអាជ្ញាធរដែនដី ទៅប្រគល់ផ្ទះថ្មី១ខ្នង គឺខ្នងផ្ទះទី២២៨ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរា ជាណាចក្រកម្ពុជា ប្រធានសមាគមអតីតយុទ្ធជនកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយៈឯកឧត្តមទេសរដ្ឋមន្រ្តី នាយឧត្ដមសេនីយ៍ កិត្តិសង្គហបណ្ឌិ គន់ គីម អគ្គលេខាធិការសមាគមអតីតយុទ្ធជនកម្ពុជា ជូនគ្រួសារអតីតយុទ្ធជនពលី នៅភូមិរំពុះ ឃុំមានជ័យ ស្រុកសណ្តាន់ ខេត្តកំពង់ធំ ។

ឧត្ដមសេនីយ៍ទោ សោម ស៊ុន បានបញ្ជាក់ថា លោកស្រី ម៉ី កាន់ អាយុ៦៤ឆ្នាំ ជាស្ត្រីមេម៉ាយ មានកូនក្នុងបន្ទុកចំនួន៤នាក់ ត្រូវជាភរិយាលោកព្រិន្ទបាលឯក គឹម រឿន ចូលបម្រើកងទ័ពនៅឆ្នាំ១៩៩២ អង្គភាពវរសេនាតូចលេខ៥ ខេត្តកំពង់ធំ ហើយបានពលីជីវិតដោយជំងឺគ្រុនចាញ់ និង របួសចាស់រើឡើងវិញនៅឆ្នាំ២០១០ ។ បច្ចុប្បន្នលោកស្រីប្រកបមុខរបរ ស៊ីឈ្នួលធ្វើស្រែ ចម្ការ ឱ្យគេបន្តិចបន្តួចគ្រាន់បានប្រាក់ចិញ្ចឹមជីវិត។

ដោយមើលឃើញពីជីវភាពរស់នៅរបស់គាត់ មានការលំបាកខ្វះខាត ពុំមានលទ្ធភាពសាងសង់ផ្ទះឱ្យបានសមរម្យដោយខ្លួនឯង ទើបគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ សម្រេចសាងសង់ផ្ទះជូនគាត់នៅពេលនេះ ជាខ្នងផ្ទះទី២២៨ អំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន ដោយបានសាងសង់ខ្ពស់ផុតពីដី សសរបេតុងឆ្អឹងដែក រនាបក្តា ជញ្ជាំងស្មាតបត ដំបូលប្រក់ស័ង្កសីកិនភ្លី និងជណ្ដើរកាច់ ។

ក្នុងពិធីប្រគល់ផ្ទះថ្មីនៅពេលនេះ ឧត្តមសេនីយ៍ទោ សោម ស៊ុន បាននាំយកនូវអំណោយរបស់ឧត្តមសេនីយ៍ឯក ហ៊ុន ម៉ាណែត និងលោកជំទាវ ផ្ដល់ជូនគាត់បន្ថែមទៀតមាន ៖ អង្ករ៥០គីឡូក្រាម, មី២កេស, ទឹកត្រី-ទឹកស៊ីអ៊ីវ២យួរ, និងសម្ភារសម្រាប់ប្រើប្រាស់ក្នុងផ្ទះបាយ មានដូចជា ឆ្នាំង, ចាន, ស្លាបព្រា, ចានដែក, និងសម្ភារផ្សេងៗមួយចំនួនទៀត ព្រមទាំងថវិកាមួយចំនួនផងដែរ។

លោកស្រី ម៉ី កាន់ គ្រួសារអតីតយុទ្ធជនពលី និងក្រុមគ្រួសារ បានគោរពថ្លែងអំណរគុណដ៏ជ្រាលជ្រៅជាទីបំផុត និង សូមគោរពជូនពរ ចំពោះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងឯកឧត្តមបណ្ឌិត ហ៊ុន ម៉ាណែត និងលោកជំទាវ រួមទាំងគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ សូមបានជួបតែនឹងពុទ្ធពរទាំងប្រាំប្រការ កុំបីឃ្លៀងឃ្លាតឡើយ និង បានប្តេជ្ញាចិត្តបន្តគាំទ្រ សម្តេច តេជោ ហ៊ុន សែន ជារៀងរហូត ៕ដោយស៊ុម វណ្ណា៖សម្រួលដោយ:ដារ៉ា