-->
សូមស្វាគមន៍ www.sps-news.com / មានទទួល សេវាកម្មផ្សាយពាណិជ្ជកម្ម គ្រប់ប្រភេទ /ទំនាក់ទំនង Tel: 090 905 988 / 086 309 181 / 016998799
សូមស្វាគមន៍ គេហទំព័រ ស្ពាន សន្តិភាព មានទទួល សេវាកម្មផ្សាយពាណិជ្ជកម្ម គ្រប់ប្រភេទ /ទំនាក់ទំនង Tel: 090 905 988 / 086 309 181 / 016998799

Friday, January 15, 2021

ឧ​ត្ត​ម​សេនីយ៍​ឯក ហ៊ុន ម៉ា​ណែ​ត​៖ សន្តិភាព ស្ថិរភាព​នយោបាយ និង​ការរីកចម្រើន​សេដ្ឋកិច្ច ផ្តល់ឱកាស​ឱ្យ​កងយោធពល​ខេមរភូមិន្ទ​កសាង​សមត្ថភាព​

ចំនួនអ្នកទស្សនា: Views

 




ភ្នំពេញ : ​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក បាន​ថ្លែងថា សន្តិភាព ស្ថិរភាព​នយោបាយ និង​ការរីកចម្រើន​ផ្នែក​សេដ្ឋកិច្ច គឺជា​ការ​ផ្តល់នូវ​ឱកាស​សម្រាប់​ការកសាង និង​អភិវឌ្ឍន៍​សមត្ថភាពរ​បស់​កងយោធពល​ខេមរភូមិន្ទ​។​

​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ថ្លែង​បែបនេះ​ក្នុងឱកាស​អញ្ជើញ​ជា​អធិបតីភាព ពិធី​បញ្ចុះបឋមសិលា​សា​ង​សង់​សំណង់​ប​ចេ្ច​ក​ទេស​លោត​ឆត្រយោង សម្ពោធ​សមិទ្ធផល​នានា បិទ​វគ្គ​ហ្វឹកហ្វឺន​ជំនាញ​កុម្ម៉ង់ដូ ជំនា​ន់ទី​១០ វគ្គ​ហ្វឹកហ្វឺន​ជំនាញ​ឆត្រយោង​ជំនា​ន់ទី​២៩ និង​បើក​វគ្គ​ហ្វឹកហ្វឺន​ជំនាញ​ឆត្រយោង ជំនា​ន់ទី​៣០ នៅ​ខេត្តកំពង់ស្ពឺ នា​ថ្ងៃ​១​កើត ខែមាឃ ឆ្នាំជូត ទោស័ក ព​.​ស​.២៥៦៤ ត្រូវ​នឹង​ថ្ងៃ​ព្រហស្បតិ៍ ទី​១៤ ខែមករា ឆ្នាំ​២០២១​។​

​ឯកឧត្តម ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​មានប្រសាសន៍ថា សមិទ្ធផល​នានា​ដែល​ត្រូវ​បានដាក់​សម្ពោធ​នៅថ្ងៃនេះ មាន​អគារ​ស្នាក់នៅ​របស់​សិក្ខា​កាម និង​អគារ​អាហារ​ដ្ឋា​ន រួមទាំង​អគារ​សំណង់​បច្ចេកទេស​ឆត្រយោង ដែល​ទើប​ត្រូវបាន​បញ្ចុះបឋមសិលា​សាងសង់​នេះ គឺជា​អំណោយ​របស់​សម្តេច​តេ​ជោ និង​សម្តេច​កិ​តិ្ត​ព្រឹទ្ធ​បណ្ឌិត ដែលជា​ផ្នែក​មួយ​នៃ​ការសាងសង់​ហេដ្ឋារចនាសម្ព័ន្ធ​នានា របស់​សាលា​ហ្វឹកហ្វឺន​ទ័ព​ពិសេស​តេ​ជោ​សែន​ឱ​រ៉ា​ល់ សម្រាប់​បម្រើឱ្យ​ការងារ​ហ្វឹកហ្វឺន​ជំនាញ​ទ័ព​ពិសេស ដែល​ស្ថិតនៅក្នុង​លំដាប់​ការងារ​អាទិភាព​មួយ​របស់​កងទ័ពជើងគោក​។​

​ឯកឧត្តម​បាន​កោតសរសើរ និង​វាយតម្លៃ​ខ្ពស់​ចំពោះ​ថ្នាក់ដឹកនាំ និង​យោធិន​ទាំងអស់​នៃ​បញ្ជាការដ្ឋាន​ទ័ព​ពិសេស ក្នុង​ការខិតខំ​ប្រឹងប្រែង​ប្រែក្លាយ​ទីនេះ​ឱ្យទៅជា​កន្លែង​ហ្វឹកហ្វឺន ក្នុងការ​លោត​ឆត្រ ដែលជា​មូលដ្ឋាន​រឹងមាំ ដើម្បី​កសាង​នូវ​ទីតាំង​យូរអង្វែង ហើយ​ស្រប​ពេលដែល​អង្គភាព​៩១១ បានប្រែក្លាយ​ខ្លួន​ពី​កងពលតូច​ទៅជា​បញ្ជាការដ្ឋាន​ទ័ព​ពិសេស ដោយ​បង្កើន​នូវ​វិសាលភាព​តួនាទី និង​ភារកិច្ច​កាន់តែ​ធំ​ជាង​មុន​។ ទីតាំង​នេះ​នឹង​ជា​មូលដ្ឋាន​សម្រាប់​ជួយ​ពង្រឹង​ជំនាញ​ទ័ព​ពិសេស សម្រាប់​គ្រប់​អង្គភាព​ចំណុះ ក៏ដូចជា​គ្រប់​បណ្តា​កងកម្លាំងប្រដាប់អាវុធ​ជាតិ​ទាំងអស់​។ ម្យ៉ាងវិញទៀត បញ្ជាការដ្ឋាន​ទ័ព​ពិសេស មាន​វិសាលភាព​ធំធេង ក្នុងការ​ចូលរួមចំណែក​ថែរក្សា​សុខសន្តិភាព និង​ស្ថិរភាព​សង្គម ដោយហេតុថា ជំនាញ​ទ័ព​ពិសេស​នេះ គឺជា​តម្រូវ​ការចាំបាច់​សម្រាប់​បរិបទ​ថ្មី នៃ​សង្គ្រាម​បែប​មិន​ប្រពៃណី​ដូចជា គ្រោះមហន្តរាយធម្មជាតិ និង​អំពើ​ភេរវកម្ម​ជាដើម​។​

​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​កោតសរសើរ​ចំពោះ​បញ្ជាការដ្ឋាន​ទ័ព​ពិសេស ក៏ដូចជា​គ្រប់​បណ្តា​ស្ថាប័ន​-​កងឯកភាព​ទាំងអស់ ដែល​កន្លងមក​បាន​ចាត់វិធានការ​ប្រុងប្រយ័ត្ន​រឹងមាំ និង​បាន​អនុវត្តន៍​នូវ​រាល់​វិធានការ​សុខាភិបាល​បាន​យ៉ាង​ខ្ជាប់ខ្ជួន ដោយ​មិនទាន់មាន​យោធិន​ក្នុងប្រទេស​ណា​ម្នាក់​រងគ្រោះ​ដោយសារ​ជំងឺ​កូ​វីដ​-១៩ នៅឡើយ​។ ស្ថានភាព​ទូទៅ​ក្នុង​ពិភពលោក​បច្ចុប្បន្ន​នៃ​ជំងឺ​កូ​វីដ​-១៩ នៅ​មិនទាន់បាន​ធូរស្រាល​នៅឡើយ ហើយ​ក្នុងនោះ​ប្រទេសមួយ​ចំនួន​កំពុង​បន្ត​រងគ្រោះ​ដោយសារ​រលក​ទី​២ និង​ទី​៣​។ ដូច្នេះ​កងទ័ព​មិនអាច​មើលស្រាល ឬ​ធ្វេសប្រហែស​នឹង​បញ្ហា​នេះឡើយ​។​

​ឯកឧត្តម​បាន​បន្តថា កងទ័ព​ត្រូវ​បន្ត​ប្រុងប្រយ័ត្ន​ខ្ពស់​ជាប់​ជានិច្ច ដោយ​អនុវត្តន៍​តាម​ការណែនាំ​នានា​របស់​ក្រសួងសុខាភិបាល ដើម្បី​ការពារ​ទប់ស្កាត់​ការឆ្លង​រាលដាល នៅក្នុង​អង្គភាព ក៏ដូចជា​ចូលរួម​បង្ការ​ការឆ្លង​នៅក្នុង​សហគមន៍​គ្រួសារ​កងទ័ព និង​គ្រួសារ​ប្រជាពលរដ្ឋ ដោយ​រួមទាំង​ការត្រៀម​លក្ខណៈ ចូលរួម​ឆ្លើយតប​តាម​ផែនការ​ទិសដៅ​ការងារ របស់​គណៈកម្មាធិការ​ជាតិ​ប្រយុទ្ធ​នឹង​ជំងឺ​កូ​វីដ​-១៩ នៅពេល​មាន​តម្រូវការ​។​

​ឯកឧត្តម​ឧ​ត្ត​ម​សេនីយ៍​ឯក ក៏បាន​អបអរសាទរ និង​កោតសរសើរ​ចំពោះ​សិក្ខាកាម​ទាំងអស់ ដែល​បាន​ហែល​ឆ្លង​បញ្ចប់​វគ្គ​ហ្វឹកហ្វឺន​ដ៏​លំបាក​នេះ​។ ជោគជ័យ​នេះ គឺ​កើតចេញពី​ការ​ហាត់ពត់លត់ដំ​កាយសម្បទា ស្មារតី និង​សតិអារម្មណ៍​ក្នុងការ​ជម្នះ​នូវ​ការលំបាក​គ្រប់បែបយ៉ាង ហើយ​គឺជា​មោទនភាព​សម្រាប់​សិក្ខាកាម​បញ្ចប់​វគ្គ​គ្រប់រូប ជាមួយ​ការសង្ឃឹម​យ៉ាង​មុតមាំ​ថា សិក្ខាកាម​ទាំងអស់​នឹង​យកចិត្តទុកដាក់​ខិតខំ​ប្រឹងប្រែង​បន្ត​រៀនសូត្រ និង​ប្រើប្រាស់​ចំណេះដឹង​ទាំង​ផ្នែក​ទ្រឹស្តី និង​ការអនុវត្ត​ទទួលបាន​ពី​វគ្គ​ហ្វឹកហ្វឺន​ទាំងនេះ សម្រាប់​យកទៅ​បំពេញ​រាល់​ភារកិច្ច​ឱ្យ​ទទួលបាន​ជោគជ័យ និង​កាន់​តែមាន​ប្រសិទ្ធភាព​ខ្ពស់​ក្នុង​បុព្វហេតុ​បម្រើ​ជាតិ មាតុភូមិ និង​ប្រជាជន​កម្ពុជា​។​

​ឯកឧត្តម​បាន​ថ្លែងអំណរគុណ​ចំពោះ​ថ្នាក់ដឹកនាំ​ក្រសួង​-​ស្ថាប័ន​ពាក់ព័ន្ធ និង​អាជ្ញាធរ​ដែនដី​គ្រប់លំដាប់​ថ្នាក់ ភាគី​មិត្ត និង​សប្បុរសជន​ទាំងអស់ ដែល​បាន​ជ្រោមជ្រែង​ក្នុង​កិច្ច​ការកសាង​សមត្ថភាព​កងទ័ព​លើ​គ្រប់ផ្នែក ទាំង​ការកសាង​ហេ​ដ្ឋា​ចរ​នា​សម្ព័ន្ធ ការហ្វឹកហ្វឺន និង​ការធានា​ផ្សេងៗ​។ ទាំងអស់នេះ​បាន​ស្តែង​ឱ្យឃើញ​នូវ​កិច្ចខិតខំ​ប្រឹងប្រែង​រួមគ្នា ដោយ​ឈរលើ​បុព្វហេតុ​រួម គឺ​ការកសាង​មូលដ្ឋាន​នៃ​កិច្ច​ការពារជាតិ ដើម្បី​ធានាបាន​នូវ​សន្តិភាព​ស្ថិតស្ថេរ​យូរអង្វែង និង​ការកសាង​ឱកាស​សម្រាប់​ការអភិវឌ្ឍ​ជាតិ​។​

​ឯកឧត្តម​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​សង្កត់ធ្ងន់ថា «​សន្តិភាព ស្ថិរភាព​ន​យោ បាយ និង​ការរីកចម្រើន​ផ្នែក​សេដ្ឋកិច្ច ក៏​ជាការ​ផ្តល់ឱកាស​សម្រាប់​ការកសាង និង​អភិវឌ្ឍន៍​សមត្ថភាព​ក​ង​យោធពលខេមរភូមិន្ទ​ផងដែរ ។ ជាពិសេស​ក្នុងពេលដែល​កម្ពុជា​ទទួល​បាន​នូវ​សុខសន្តិភាព ឯកភាព​ជាតិ ឯកភាព​ទឹកដី និង​ការអភិវឌ្ឍ​រីកចម្រើន​ដូច​សព្វថ្ងៃ ជា​សមិទ្ធផល​នៃ​នយោបាយ​ឈ្នះ​-​ឈ្នះ ដែលមាន​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ជា​ស្ថាបនិក​»៕​ដោយ​៖ សំ សាម៉ន សម្រួល​ផ្សាយ​ដោយ​៖ spsnews

0 comments:

Post a Comment