TikTok ទំនងអាចបន្តដំណើរការបាននៅក្នុងសហរដ្ឋអាមេរិក ក្រោមកិច្ចព្រមព្រៀងពិសេសមួយ

 

(បរទេស)៖ ប្រធានាធិបតីអាមេរិកលោក ដូណាល់ ត្រាំ បានប្រកាសនៅពីថ្ងៃអង្គារសប្តាហ៍នេះថា សហរដ្ឋអាមេរិក និងចិន បានឈានដល់កិច្ចព្រមព្រៀងឲ្យកម្មវិធី TikTok អាចបន្តដំណើរការបាននៅក្នុងសហរដ្ឋអាមេរិក។ តាមប្រភពបានឲ្យដឹងថា កិច្ចព្រមព្រៀងនេះគឺស្រដៀងនឹងកិច្ចព្រមព្រៀងមួយដែលបានពិភាក្សាហើយកាលពីដើមឆ្នាំនេះ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី១៧ ខែកញ្ញា ឆ្នាំ២០២៥។

ខ្លឹមសារសំខាន់ៗនៃកិច្ចព្រមព្រៀងនេះ គឺ TikTok ត្រូវផ្ទេរទ្រព្យសម្បត្តិទាំងអស់នៅអាមេរិកទៅឱ្យម្ចាស់ជាជនជាតិអាមេរិក ដើម្បីផ្តាច់ខ្លួនចេញពីក្រុមហ៊ុន ByteDance របស់ចិន។ TikTok មានអ្នកប្រើប្រាស់ប្រមាណ ១៧០លាននាក់នៅអាមេរិក ដោយប្រធានាធិបតី ត្រាំ បាននិយាយថា «យើងមានកិច្ចព្រមព្រៀងហើយ... មានក្រុមហ៊ុនដ៏ធំៗចង់ទិញវា»។ ដំណើរការនេះនឹងជួយបញ្ចប់វិវាទដែលបានបន្តជាងមួយឆ្នាំ ដែលកំពុងប៉ះពាល់ដល់ទំនាក់ទំនងពាណិជ្ជកម្មអាមេរិក-ចិន និងទីផ្សារពិភពលោក។ ថ្ងៃកំណត់ដំបូងដើម្បីលក់ឬបិទ TikTok គឺថ្ងៃទី១៧ ខែកញ្ញា តែបានពន្យារពេលរហូតដល់ថ្ងៃទី១៦ ខែធ្នូ។

ពាក់ព័ន្ធនឹងការរៀបចំថ្មីនៃ TikTok នៅសហរដ្ឋអាមេរិក ដោយសាជីវកម្មថ្មីនឹងមានគណៈកម្មការដែលគ្រប់គ្រងដោយជនជាតិអាមេរិក និងមានសមាជិកម្នាក់តំណាងរដ្ឋាភិបាលអាមេរិក។ ByteDance នឹងរក្សាការចូលរួមរបស់ខ្លួន តែត្រឹម ១៩.៩% ពោលគឺមិនលើស ២០%។ ក្រុមហ៊ុនដែលនឹងចូលរួមទិញមាន៖Susquehanna International Group (SIG), General Atlantic, KKR, Andreessen Horowitz, Oracle និង Silver Lake។ TikTok សាធារណរដ្ឋអាមេរិកនឹងក្លាយជា ក្រុមហ៊ុនថ្មីមានមូលដ្ឋាននៅអាមេរិក និងមានម្ចាស់ស្របច្បាប់ជាជនជាតិអាមេរិក។

គួរជម្រាបថា កិច្ចព្រមព្រៀងនេះត្រូវអនុម័តដោយសភាអាមេរិក (ដែលគ្រប់គ្រងដោយគណបក្សសាធារណរដ្ឋ) ដោយផ្អែកលើច្បាប់ដែលបានអនុម័តនៅឆ្នាំ២០២៤។ ច្បាប់នោះបញ្ជាក់ថា TikTok ត្រូវបានផ្តាច់ចេញពី ByteDance ដោយសារបារម្ភពីការចូលប្រើទិន្នន័យអ្នកប្រើប្រាស់អាមេរិកដោយរដ្ឋាភិបាលចិន។ លោក Scott Bessent រដ្ឋមន្ដ្រីហិរញ្ញវត្ថុអាមេរិកបាននិយាយថា «កិច្ចព្រមព្រៀងនេះ ត្រូវបានពិភាក្សាស្ទើរតែរួចរាល់តាំងពីខែមីនា ហើយសល់ត្រឹមការតំរូវលម្អិតបន្តិចបន្តួចប៉ុណ្ណោះ»។ CNBC រាយការណ៍ថា កិច្ចព្រមព្រៀងនឹងត្រូវបិទក្នុងរយៈពេល៣០ ដល់ ៤៥ ថ្ងៃ។ TikTok នឹងបន្តដំណើរការបាន នៅសហរដ្ឋអាមេរិក ប្រសិនបើកិច្ចព្រមព្រៀងនេះបានអនុវត្ត៕

អ្នកនិពន្ឋ: ព័ត៌មានជាតិ