ភ្នំពេញ:ថ្ងៃទី១២ ខែកុម្ភៈ ឆ្នាំ២០២២ ដើម្បីធ្វើឱ្យកាន់តែប្រសើរឡើងនូវព្រឹត្តិការណ៍កីឡាអូឡាំពិក និងប៉ារ៉ាឡាំពិករដូវរងាទីក្រុងប៉េកាំងឆ្នាំ២០២២ ផ្លូវរថភ្លើងល្បឿនលឿន Beijing-Zhangjiakou បានចាប់ផ្តើមដំណើរការជាមួយនឹងរថភ្លើងឆ្លាតវៃ Fuxing ជំនាន់អូឡាំពិក ដែលត្រូវបានគាំទ្រដោយបច្ចេកវិទ្យាទំនើប និងផ្តល់សេវាកម្មងាយស្រួលដល់អ្នកដំណើរ។
ផ្នែកខាងក្រៅនៃរថភ្លើងមានពណ៌ខៀវ តុបតែងដោយស្ទ្រីមពណ៌ស រំលេចដោយលំនាំរូបផ្កាព្រិល ដែលតំណាងឱ្យបរិយាកាសនៃព្រឹត្តិការណ៍កីឡាអូឡាំពិករដូវរងា។ វត្ថុអនុស្សាវរីយ៍កីឡាអូឡាំពិករដូវរងាក៏មានដាក់លក់នៅលើរថភ្លើងសម្រាប់ឱ្យអ្នកដំណើរទិញផងដែរ។
ស្ទូឌីយោបបច្ចេកវិទ្យាខ្ពស់មួយជាមួយនឹងប្រព័ន្ធអ៊ីនធើណេតកម្រិត 5G ត្រូវបានបង្កើតឡើងនៅខាងក្នុងរថភ្លើងនោះដើម្បីធានាដល់ការផ្តល់សេវាប្រព័ន្ធអ៊ីនធើណេតដោយរលូននៃព្រឹត្តិការណ៍ប្រកួតកីឡាអូឡាំពិកដោយអ្នកសារព័ត៌មានមកពីជុំវិញពិភពលោក។ ការរៀបចំនេះ គឺជាការរៀបចំជាលើកដំបូងគេបង្អស់ដែលស្ថិតនៅក្នុងរថភ្លើងល្បឿនលឿន។
រថភ្លើងនេះក៏មានចាក់ផ្សាយព្រឹត្តិការណ៍ប្រកួតកីឡាអូឡាំពិករដូវរងាជាភាសាចិន និងភាសាអង់គ្លេសដែរ ខណៈដែលផ្តល់ជូនដល់អ្នកដំណើរនូវកន្លែងថ្នាក់ពាណិជ្ជកម្មជាមួយនឹងសេវាកម្មនានា ដូចជាកម្មវិធីកម្សាន្ត អេក្រង់បញ្ចាំងឥតខ្សែ និងព័ត៌មានប្រតិបត្តិការរថភ្លើង ក្នុងចំណោមសេវាកម្មផ្សេងៗទៀត។
អំពូលភ្លើងឆ្លាតវៃត្រូវបានបំពាក់នៅក្នុងបន្ទប់ទឹកទាំងអស់ ហើយប្រព័ន្ធម៉ាស៊ីនត្រជាក់ត្រូវបានរចនាឡើងដើម្បីឱ្យមានថាមពល និងផ្តល់ផាសុកភាពដល់អ្នកដំណើរទាំងអស់នៅលើរថភ្លើង។
លើសពីនេះទៀត លក្ខណៈពិសេស និងឧបករណ៍បច្ចេកវិទ្យាផ្សេងៗទៀតមានដូចជាប្រព័ន្ធប្រតិបត្តិការ និងថែទាំ ប្រព័ន្ធគ្រប់គ្រងឆ្លាតវៃ ប្រព័ន្ធស្វែងរកកំហុសឆ្គង និងមនុស្សយន្តថែទាំ ប្រព័ន្ធតាមដាន និងព្រមានចំពោះគ្រោះមហន្តរាយតាមពេលវេលាជាក់ស្តែង និងប្រព័ន្ធផ្កាយរណប Beidou Navigation Satellite ដែលត្រូវបានប្រើប្រាស់នៅលើរថភ្លើងដើម្បីធានានូវប្រតិបត្តិការរថភ្លើងប្រកបដោយសុវត្ថិភាព៕ (ប្រភព BRNN បកប្រែដោយលោក យា ចិន្តាខន្តី) សម្រួលផ្សាយដោយ៖ dara
![](https://static.information.gov.kh/rails/active_storage/blobs/eyJfcmFpbHMiOnsibWVzc2FnZSI6IkJBaHBBd0V3QXc9PSIsImV4cCI6bnVsbCwicHVyIjoiYmxvYl9pZCJ9fQ==--f78f126e27bf096f18f8e57639e7c1a35ccdeff5/photo_2022-02-03_09-11-07.jpg)
![](https://static.information.gov.kh/rails/active_storage/blobs/eyJfcmFpbHMiOnsibWVzc2FnZSI6IkJBaHBBd0F3QXc9PSIsImV4cCI6bnVsbCwicHVyIjoiYmxvYl9pZCJ9fQ==--2082f3bd7f4c4b9c721010aab2c137cfbd9bff6e/photo_2022-02-12_08-50-52.jpg)
![](https://static.information.gov.kh/rails/active_storage/blobs/eyJfcmFpbHMiOnsibWVzc2FnZSI6IkJBaHBBd013QXc9PSIsImV4cCI6bnVsbCwicHVyIjoiYmxvYl9pZCJ9fQ==--c68213e298727a2d0ec70b9df7e7f066a8cf7fcb/photo_2022-02-12_08-50-56.jpg)
![](https://static.information.gov.kh/rails/active_storage/blobs/eyJfcmFpbHMiOnsibWVzc2FnZSI6IkJBaHBBd0l3QXc9PSIsImV4cCI6bnVsbCwicHVyIjoiYmxvYl9pZCJ9fQ==--7329526a7911204eb1014b4dcef807646a315b59/photo_2022-02-12_08-51-00.jpg)
0 comments:
Post a Comment