(ភ្នំពេញ): ថ្ងៃទី១៧ ខែមេសា ឆ្នាំ២០២១ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានឱ្យដឹងតាមរយៈសារសម្លេងបន្ទាន់មួយនៅព្រឹកនេះថា រាល់បងប្អូនប្រជាពលរដ្ឋដែលជាប់គាំងនៅក្នុងអំឡុងពេលបិទខ្ទប់ អាចអញ្ជើញទៅចាក់វ៉ាក់សាំងកូវីដ-១៩ ដូសទី២បាន នៅនឹងកន្លែងដែលកំពុងជាប់គាំងតែម្តង ដោយពុំចាំបាច់ធ្វើដំណើរឆ្លងខេត្ត ឬក្រុង ទៅកាន់ទីតាំងដែលបានចាក់ដូសទី១ នោះទេ។
លោកជំទាវវេជ្ជបណ្ឌិត បានបញ្ជាក់បន្ថែមថា ៖ “ដើម្បីជំរុញក្នុងការអនុវត្តវិធានការបម្រាមបិទខ្ទប់ ដែលបានចូលជាធរមាន ដែលដាក់ចេញឱ្យអនុវត្តដោយ សម្តេចប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន កាលពីថ្ងៃទី១៥ ខែមេសា ឆ្នាំ២០២១កន្លងទៅនេះ រាល់បុគ្គលគ្រប់រូប ដែលបានចាក់វ៉ាក់សាំងកូវីដ-១៩ ដូសទី១រួចហើយ ហើយដែលនឹងត្រូវចាក់ដូសទី២ ប៉ុន្តែបានជាប់គាំងក្នុងអំឡុងពេលនៃការបិទខ្ទប់ នៃរាជធានីភ្នំពេញ និងក្រុងតាខ្មៅ គឺរាល់បុគ្គលខាងលើនេះ បើសិនជាជាប់គាំងនៅខេត្តណា ឬក្រុងណា ត្រូវចាក់វ៉ាក់សាំងនៅខេត្ត ឬក្រុងនោះតែម្តង ដោយត្រូវធ្វើការទំនាក់ទំនង ទៅមន្ទីរសុខាភិបាលក្នុងដែនសមត្ថកិច្ច នៃខេត្ត ឬក្រុងទាំងនោះ ដោយពុំត្រូវធ្វើដំណើរឆ្លងខេត្ត ឬក្រុងនោះឡើយ”។
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBeWdxQWc9PSIsImV4cCI6bnVsbCwicHVyIjoiYmxvYl9pZCJ9fQ==--9f4a7d9d23d67a0bd44f2afee5404dc68ae97fb1/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/9DE272A7-8C6D-4EF5-ADA2-CE2FE6F.jpeg)
មានន័យថា បងប្អូនប្រជាពលរដ្ឋទាំងអស់ កំពុងជាប់នៅកន្លែងណា? ហើយត្រូវដល់ពេលចាក់វ៉ាក់សាំងដូសទី២ បន្ទាប់ពីបានចល័ត ឬធ្វើដំណើរ ទៅខេត្ត គឺត្រូវចាក់វ៉ាក់សាំងនៅទីតាំងដែលបុគ្គលកំពុងមានវត្តមានតែម្តង ដោយលោកជំទាវបានណែនាំថា ត្រូវចាក់ដូសទី២ ក្នុងចន្លោះពេលពី ១៤ថ្ងៃ ទៅ ២១ថ្ងៃ បន្ទាប់ពីចាក់ដូសទី១ សម្រាប់វ៉ាក់សាំង Sinovac។
ក្រសួងសុខាភិបាល ក៏ដូចជាគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នឹងចាត់ចែងដឹកវ៉ាក់សាំងទៅផ្គត់ផ្គង់ដល់មន្ទីរសុខាភិបាលរាជធានី-ខេត្តទាំង២៥ គឺក្នុងមួយខេត្ត នឹងជូនវ៉ាក់សាំងចំនួន ២០០ដូស សម្រាប់ត្រៀមបម្រុងទុកចាក់ជូនបុគ្គលដែលបានជាប់បម្រាមបិទខ្ទប់ នៅតាមបណ្តាខេត្តនីមួយៗ។
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBeXNxQWc9PSIsImV4cCI6bnVsbCwicHVyIjoiYmxvYl9pZCJ9fQ==--741d97ba653166fb9c431a82806823a887c752fd/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/4BD3266B-3B8F-4312-96F6-2E0C7AE.jpeg)
សូមរម្លឹកផងដែរថា បម្រាមបិទខ្ទប់រាជធានីភ្នំពេញ និងក្រុងតាខ្មៅ ជាបណ្តោះអាសន្នចំនួន ០២សប្តាហ៍ ដែលបានដាក់ចេញកាលពីថ្ងៃទី១៥ ខែមេសានោះ គឺដើម្បីកាត់ផ្តាច់ខ្សែចម្លងវីរុសកូវីដ-១៩ ពីបុគ្គលម្នាក់ ទៅបុគ្គលម្នាក់ និងដើម្បីបញ្ឈប់ការចរាចរវីរុសនេះ ពីខេត្តឆ្លងចូលខេត្ត ខេត្តឆ្លងចូលក្រុង ឬ ពីក្រុងឆ្លងចូលខេត្ត។
ដោយឡែក កាលពីយប់ថ្ងៃទី១៦ ខែមេសា សម្តេចតេជោ ហ៊ុន សែន ក៏បានចេញបទបញ្ជាបន្ថែមដល់គណៈអភិបាលរាជធានីខេត្តទាំង២៥ ត្រូវអនុវត្តវិធានការរដ្ឋបាល និងទោសទណ្ឌ ចំពោះបុគ្គលដែលល្មើសនឹងវិធានការនេះ។ សម្តេចតេជោ ក៏បានអំពាវនាវដ៏ទទូច ដល់បងប្អូនជនរួមជាតិ ត្រូវតែចូលរួមអនុវត្តទាំងអស់គ្នា ដោយត្រូវនៅផ្ទះ កុំចល័ត កុំជួបជុំ ហើយបើក្នុងករណីការរីករាលដាលពុំស្រាកស្រាន ឬថមថយទេនោះ វិធានការបិទខ្ទប់នេះអាចនឹងអូសបន្លាយបន្ថែមទៀត៕
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBeWtxQWc9PSIsImV4cCI6bnVsbCwicHVyIjoiYmxvYl9pZCJ9fQ==--a2f48a4927aa19b7d1e8a0572b187f4496ea31d5/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/54701E0A-C182-4686-AA26-7EE3748.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBeW9xQWc9PSIsImV4cCI6bnVsbCwicHVyIjoiYmxvYl9pZCJ9fQ==--dca43b11b981d5b614e565db507877034db7304c/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/9EE8A6C9-FE78-4ECE-A0B2-4F0A139.jpeg)
ដោយ ផែន រតនៈ, សម្រួលផ្សាយ៖sps-news
0 comments:
Post a Comment