៦​ថ្ងៃៈ ឃាត់ខ្លួន​មេខ្យល់ ចំនួន ៣៥​នាក់ និង​ពលករ គេ​ចេះ​វេះ​ធ្វើ​ច​ត្តា​ឡី​ស័ក ចំនួន ៥៤​នាក់​

 

ភ្នំពេញៈ មេខ្យល់​ដែល​នាំ​មនុស្ស ឆ្លងកាត់​ព្រំដែន​ខុសច្បាប់ គឺ​ព្រំដែន​កម្ពុជា​-​ថៃ​-​វៀតណាម ត្រូវបាន​សមត្ថកិច្ច ចាប់​ឃាត់ខ្លួន ចំនួន ៣៥ នាក់ គិត​ចាប់ពី​ថ្ងៃទី​១៣ – ១៨ ខែកុម្ភៈ ឆ្នាំ​២០២១ ។ នេះ​បើតាម មន្ត្រីជាន់ខ្ពស់ អគ្គស្នងការដ្ឋាន នគរបាលជាតិ បាន​ប្រាប់​រស្មី​កម្ពុជា នៅ​ល្ងាច​ថ្ងៃទី​១៩ ខែ​កម្ភៈ ឆ្នាំ​២០២១​។​

​ប្រភព​ដដែល បានបញ្ជាក់​ថាៈ មេខ្យល់​នាំ​ប្រជាពលរដ្ឋ ឆ្លងដែន​ខុសច្បាប់ ដែល​សមត្ថកិច្ច ចាប់ខ្លួន មានដូចជា ខេត្តបន្ទាយមានជ័យ បាត់ដំបង ឧ​ត្ត​រ​មានជ័យ ប៉ៃលិន កំពត ស្វាយរៀង តាកែវ និង​ខេត្តកោះកុង​។ មេខ្យល់ បាន​ប្រើល្បិច​ថ្មី ដោយ​នាំ​មនុស្ស ឆ្លងដែន​ខុសច្បាប់ ប្រើ​រូបភាព​បន្លំ​ភ្នែក​សមត្ថកិច្ច ដោយបាន​ដាក់​បង្កប់ មនុស្ស​នៅក្នុង​រថយន្ត ដឹក​ផ្លែឈើ​…​។​

​មន្ត្រី បាន​បន្តថាៈ ការស្វែងរក និង​ទប់ស្កាត់ ពលករ​គេចវេះ ពី​ការធ្វើ​ច​ត្តា​ឡី​ស័ក គឺ​គិត​ចាប់ពី​ថ្ងៃទី​១៣ – ១៨ ខែកុម្ភៈ ឆ្នាំ​២០២១ មាន​ចំនួន ៥៤ នាក់ ក្នុងនោះ​ស្រី ២៨ នាក់ និង​បាន​បញ្ជូនទៅ មណ្ឌល​ធ្វើ​ច​ត្តា​ឡី​ស័ក​។ ពលករ​ដែល គេចវេះ ពី​ការធ្វើ​ច​ត្តា​ឡី​ស័ក មានដូចជា ខេត្តតាកែវ ចំនួន ២១​នាក់ (​ស្រី ១០​នាក់​) , ខេត្ត​ត្បូងឃ្មុំ មាន​ចំនួន ១៣ នាក់ (​ស្រី ៨​នាក់​) , ខេត្តស្វាយរៀង ចំនួន ៩​នាក់ (​ស្រី ៤​ន​នាក់​) , ខេត្តព្រៃវែង ចំនួន ៦​នាក់ (​ស្រី ៣​នាក់​) និង​ខេត្តសៀមរាប ចំនួន ៥​នាក់ (​ស្រី ៣ នាក់​)​។​

​សូមជម្រាបថា កម្លាំង​សមត្ថកិច្ច​ពាក់ព័ន្ធ នៅ​ខេត្ត​ជាប់​ព្រំដែន ថៃ និង​វៀតណាម បាន​ខិតខំ​ធ្វើការ​ទប់ស្កាត់ ពលករ​ឆ្លងដែន ខុសច្បាប់ និង​ស្រាវជ្រាវ រក​មេខ្យល់ ដើម្បី​នាំយកមក​ផ្តន្ទាទោស តាមច្បាប់​៕

        

អ្នកនិពន្ឋ: ព័ត៌មានជាតិ